Վերանորոգում, թե վանդալիզմ

«Չենք լռելու» նախաձեռնությունը ահազանգ է հնչեցրել Հաղարծնի վանքի բարեկարգման աշխատանքներն անփութորեն կատարելու առնչությամբ։

Նախաձեռնության տարածած հաղորդագրության համաձայն` 2006 թվականին Հայաստան այցելության ընթացքում Արաբական Միացյալ Էմիրությունների շեյխ Սուլթան բեն Մուհամմադ ալ Քասիմիին այնքան էր հիացրել Տավուշի մարզում գտնվող Հաղարծինի վանական համալիրը (XIII դար), որ որոշել էր 5 մլն ԱՄՆ դոլար հատկացնել դրա բարեկարգման նպատակով:

Տեղեկատվության համաձայն` շինարարական աշխատանքներն արդեն մոտենում են ավարտին, եւ այսօր Հաղարծնի համալիրը, կարծես, նոր շունչ է ստացել:

Նախաձեռնությունն արաբ շեյխի ուշադրությունն է հրավիրում պատմական հուշարձանների վերանորոգման համար սահմանված ստանդարտները չպահպանելու փաստին: Այսպես, ըստ մամուլի հրապարակումների, շինարարները անփութորեն քանդել են հին զարդաքանդակները եւ դրանք օգտագործել ջրահեռացման առվակի համար:

Այն հարցին, թե ինչո՞ւ է զարդաքանդակներով քարերը ջարդում, շինարարներից մեկը կոպիտ արձագանքել է. «Մեզ այդպես են ասել»:

Նախաձեռնությունը կոչ է անում Մայր Աթոռին եւ Հայաստանի մշակույթի նախարարությանը` հավուր պատշաճի վերահսկել Հաղարծնի բարեկարգման գործընթացը: