Մեր ծիրանին աջակցողները

«Ոսկե ծիրան» միջազգային կինոփառատոնն իր գործունեության 8 տարիների ընթացքում համագործակցել է Հայաստանում մի շարք երկրների դեսպանների և միջազգային այլ առաքելությունների հետ:

«Տարեցտարի ընդլայնելով համագործակցության շրջանակը` այսօր հայ հանդիսատեսին հնարավորություն է տրվել դիտել համաշխարհային կինոյի լավագույն նմուշները»,- նշեց «Ոսկե ծիրան»-ի գեղարվեստական տնօրեն Սուսաննա Հարությունյանը:

Նա ավելացրեց, որ այս տարի առաջին անգամ փառատոնին աջակցում է ԱՊՀ երկրների հումանիտար համագործակցության հիմնադրամը: Եվրոպական մշակութային ֆոնդի և Եվրասիայի համագործակցության հիմնադրամի աջակցությամբ էլ կանցկացվեն Հայ-թուրքական կինոպլատֆորմը և «Ռեժիսորներն առանց սահմանի» համատեղ արտադրության ֆորումը, որի կայացմանն էլ աջակցել է Բրիտանական խորհուրդը:

Եվրոպական համագործակցության հիմնադրամի տնօրեն Գևորգ Տեր-Գաբրիելյանը տեղեկացրեց, որ արձանագրվել է եվրոպական համագործակցության արդյունավետ փորձ: «Համագործակցում ենք և պետք է համագործակցենք, քանի որ անցած տարվանից խմորվել են մի շարք նախագծեր, որոնք պետք է իրագործվեն»,- ասաց նա:

Ֆրանսիայի դեսպանատան աջակցությամբ` հետահայաց ցուցադրությամբ կներկայանա անվանի ռեժիսոր Բերտրան Տավերնիեն, իսկ գերմանական դեսպանատան և Գյոթեի ինստիտուտի ջանքերով «Ոսկե ծիրանին» կմասնակցեն մրցութային անվանակարգերում ներառված 4 ֆիլմների ռեժիսորները, և կցուցադրվի փառատոնի փակման ֆիլմը`աշխարհահռչակ ռեժիսոր Վիմ Վենդերսի 3D ձևաչափով նկարահանված «Պինա» կինոնկարը: