Պետք է խրախուսել ներդրումները

Ներդրումային քաղաքականությունն արդեն տարվա վերջին կտա իր ծիլերը. համոզված է ԱԺ ԲՀԿ խմբակցության պատգամավոր Վարդան Բոստանջյանը:

«Երկիր»-ի հարցին, թե կառավարության քաղաքականությունը որքանո՞վ է նպաստում իրական տնտեսության մեջ ներդրումներ կատարելուն,  Վարդան Բոստանջյանը պատասխանեց. «Կարծում եմ` մենք այլընտրանք չունենք: Ներդրումները շատ կարեւոր են ցանկացած երկրի համար, ընդհանրապես, եւ Հայաստանի համար` մասնավորապես, եւ մեր երկրի կառավարությունը դա շատ լավ գիտակցում է»:

Նա նշեց, որ ՀՀ նախագահի ուղղակի եւ առանց որեւէ կոմպրոմիսի մոտեցումը` ներդրումները խրախուսելու հետ կապված, գնահատելի է, եւ այդ ուղղությամբ արդեն որոշակի քաղաքականություն իրականացվում է. «Մասնավորապես` կառավարության վերջին նիստում մենք տեղեկացանք, որ գրեթե 67 միլիարդի չափով ներդրումներ են կատարվելու, եւ շատ ընկերություններ կան, որոնք պետք է ներդրումներ կատարեն, պետք է բարձրացնեն մեր երկրի տնտեսական գրավչությունը: Այդ առումով ես կարծում եմ, որ այս քաղաքականությունն իր ծիլերը կտա արդեն տարվա վերջին կամ մյուս տարվա ընթացքում»: