Եթե խնայողություններն ավելի պակաս են, քան ներդրումները, ուրեմն պետք է պարտք վերցնել. նախարար

Այսօր  կառավարության նիստից հետո լրագրողների հետ զրույցում  ֆինանսների նախարար Վարդան Արամյանն անդրադարձավ Հայաստանի պետական պարտքին: Նշենք, որ կառավարությունն առաջիկայում պատրաստվում է կրկին 350 մլն դոլար վարկ վերցնել:

Նախարարի խոսքով` պարտքը վտանգավոր չէ, և Հայաստանը հարաբերական ցուցանիշներով գտնվում է  նվազ պարտքի բեռ ունեցող երկրների շարքում: Եվ քանի դեռ պետությունն իր հարկաբյուջետային քաղաքականության շրջանակներում ունի դեֆիցիտ, ակնհայտ է, որ դրա ծածկման աղբյուրը պարտքի ներգրավումն է: Սակայն, մյուս կողմից, նախարարը հույս հայտնեց, որ սպասվող ներդրումները կնվազեցնեն վարկերի հետագա ներգրավումը:

«Եթե մենք ունենանք ներդրումներ, դա շատ ավելի նպաստավոր պայմաններ կստեղծի մեր տնտեսական վիճակի համար: Մյուս կողմից` եթե երկրի խնայողություններն ավելի պակաս են, քան ներդրումները, պետք է օգտագործվեն նաև արտաքին խնայողությունները կամ պետք է պարտք վերցնել: Սա աքսիոմատիկ ճշմարտություն է»,- ասաց Վարդան Արամյանը: