Էլ ինչ "Ոսկե ծիրանն" առանց "Կորիզի"

«Ոսկե ծիրան» 8-րդ կինոփառատոնի շրջանակներում կանցկացվի նաեւ «Կորիզ» կարճամետրաժ ֆիլմերի մրցույթը, որի գլխավոր նպատակը երիտասարդ ռեժիսորներին կինոարտադրության մեջ ընդգրկելն է:

«Ոսկե ծիրանը» հնարավորություն է ընձեռել երիտասարդներին այս խորագրի ներքո իրականացնել իրենց մտահղացումները, ինքնուրույն ձեւակերպել պահանջները, ֆիլմերի ընտրության սկզբունքները, ինչպես նաեւ կատարել ֆիլմերի ընտրությունը: Մրցույթին ներկայացված 135 ֆիլմից ընտրվել են միայն 25-ը, որոնց մեջ կան և' ակադեմիական, և' էքսպերիմենտալ ֆիլմեր:

«Կորիզ» անվանակարգի ժյուրին կնախագահի պրոդյուսեր Թիերի Լենուվելը (Ֆրանսիա): Ժյուրիի մյուս անդամներն են ճանաչված կինոգետ Օլգա Շերվուդը (Ռուսաստան) եւ կանադահայ ռեժիսոր Կարինե Թորոսյանը:

«Կարճամետրաժ ֆիլմը հնարավորություն է տալիս համարձակ ցույց տալ պատմությունը: Այն ճիշտ մտածողություն է ծնում»,- ասաց ռեժիսոր Արամ Շահբազյանը:

Ըստ նրա` հատկապես երիտասարդ ռեժիսորների շրջանում կա մտածելակերպ, որ առանց մեծ գումարների հնարավոր չէ լավ ֆիլմ ստեղծել:

«Խնդրում եմ, եկեք նայեք այս ֆիլմերը և կտեսնեք, թե ինչպես կարելի է չնչին գումարներով ստանալ մի պատմություն, որը կարող է ասել ավելին, քան 2 ժամանոց ֆիլմը»,- ասաց Ա. Շահբազյանը:

Կարևորը միտքն է, հավատացնում են կինոգործիչները, նոր թեմաների ի հայտ բերումն ու դրանք նոր տեսանկյան տակ դիտարկելը: Խոսքը հենց կինոյի լեզվի մասին է. «Անպայման չէ, որ ֆիլմը նկարված լինի ամենավերջին տեխնիկայով, լույսերով, ո’չ, ֆիլմում ամենագլխավորը լեզուն է, ասելիքի ձևը, որը մեր հայ իրականության մեջ նորոգվելու կարիք է զգում: Պատմությունը ժամերով պատմել պետք չէ, այլ` լակոնիկ ու դիպուկ»:

Ռեժիսոր Լուսինե Սարգսյանի խոսքով` ծրագիրը կինոյի այբուբենը սովորեցնելու համար է:

«Կորիզ» ծրագրի մասնակից երիտասարդ ստեղծագործողների ֆիլմերը կցուցադրվեն Տիկնիկային թատրոնում` հայերեն թարգմանությամբ: