Սիրիայի նախագահը նոր համաներում է հայտարարել

Սիրիայի նախագահ Բաշար ալ Ասադը հայտարարել է, որ այսօրվանից երկրում նոր համաներում է լինելու. տեղեկացնում է Սիրիայի պետական հեռուստատեսությունը:

Համաներումը տարածվում է մինչեւ 2011 թվականի հունիսի 20-ը կատարված բոլոր հանցագործությունների վրա, այդ թվում` որոնք կատարվել են մայիսի 31-ից հայտարարված համաներումից հետո անցկացված ցույցերի ժամանակ:

Համաներվելու են նաեւ քաղաքական բանտարկյալները, ներառյալ` երկրում արգելված «Մուսուլման եղբայրներ» կազմակերպության անդամները: Այս քայլով իշխանությունները փորձում են մեղմել երկրում ստեղծված լարվածությունը:

Սիրիացի իրավապաշտպանների տվյալներով` անվտանգության ուժերի հետ բախումների ժամանակ զոհվել է 1,3 հազար մարդ, այդ թվում` 340 զինծառայող եւ ոստիկան: Երկրի հյուսիսային քաղաքները դատարկվել են, քանի որ, վախենալով բռնություններից, մարդիկ փախչում են հարեւան Թուրքիա: