Որոնք են մոլորակի բնակիչների ամենասիրված կերակուրները

Մակարոն, միս, բրինձ, պիցցա եւ հավի միս. «Օքսֆամ» կազմակերպության հարցախույզին մասնակցած 17 երկրների բնակիչներն իրենց ամենասիրելի կերակրատեսակների ցանկում նշել են հենց սրանք:

Հարցվածների երկու երրորդը հայտարարել է, որ սննդի` իրենց անձնական եւ ընտանեկան օրաբաժնի ձեւավորման գործոն է դրա արժեքը: Ի դեպ, հարցախույզի մասնակիցների կեսից ավելին խոստովանել է, որ արդեն չի կարող իրեն թույլ տալ նույն կերակուրը, ինչ երկու տարի առաջ. երկու երրորդը դա բացատրում է թանկությամբ:

Առողջության նկատառումները եւ կերակրի սննդարարությունը նույնպես առաջնահերթ են սննդի ընտրության հարցում:

ԱՄՆ-ում ամենասիրված կերակուրը պիցցան է: Ավստրալացիների մեծ մասը քաղցրակեր է՝ գերադասում է շոկոլադը: Անգլիացիները նախընտրում են սթեյկը, իսկ իսպանացիները՝ պաելիան: Հնդկաստանում նախապատվությունը տալիս են ազգային խոհանոցի կերակրատեսակներին, իսկ Ռուսաստանում՝ մսեղենին, կարտոֆիլին եւ բանջարեղենային աղցաններին: