Ռիչարդ Բրենսոնը կստեղծի Բրիտանիայի վեցերորդ խոշոր բանկը

Բրիտանացի գործարար, Virgin բազմապրոֆիլ կոնցեռնի հիմնադիր Ռիչարդ Բրենսոնը պատրաստվում է գնել Lloyds բանկային ընկերության 600 մասնաճյուղերը. գրում է Financial Times-ը:

Այսօր  գործարքի մանրամասները քննարկելու համար Բրենսոնը հանդիպել է Lloyds-ի գործադիր տնօրեն Անտոնիո Օրտա-Օսորիոյի հետ:

«Ամեն ինչ պետք է արագ եւ առանց խնդիրների արվի: Մենք լուրջ ընկերություն ենք եւ կարող են կառավարությանը տալ այն ամենը, ինչ ցանկանում է»,- ասել է գործարարը:

Բանն այն է, որ նախորդ օրը Բրիտանիայի քաղաքական գործիչները պատրաստակամություն են հայտնել ստեղծել նոր իրավական նորմեր, որոնք կզսպեն մոնոպոլիստներին եւ հնարավոր կդարձնեն նոր բիզնեսի առաջխաղացումը:

«Երկրում պետք է տասնյակ բանկեր լինեն, այլ ոչ թե չորս-հինգ»,- ասել է բրիտանական խորհրդարանի անդամ Անդրեա Լիդսոմը:

Թեեւ կառավարությունը դեռ հավանություն չի տալիս այդ գործարքին, սակայն փորձագետները համարում են, որ Բրենսոնը կհաջողի այս գործում եւ կստեղծի Բրիտանիայի ամենախոշոր վեցերորդ բանկը` Virgin Money-ը: