Միայն Աստված գիտի

Թե ե՞րբ է լինելու աշխարհի վերջը, ամենաբարդ հարցերից մեկն է: Տեր Բաբկեն քահանա Հայրապետյանն այսօր լրագրողների հետ հանդիպման ժամանակ անդրադառնալով երկու օր առաջ սպասվող «աշխարհի վերջին», ասաց, որ իրենք, ինչպես բոլորը, այս դեպքում էլ հիմք են ընդունում Ավետարանը:

Սուրբ գրքում  հստակ ժամկետներ չեն նշվում, Քրիստոսն իր աշակերտներին պատասխանում է, որ, Հայր Աստծուց բացի, ոչ ոք չգիտի, թե երբ կգա այդ ժամը: Սակայն գրվում է, թե կլինեն կանխանշաններ` պատերազմներ, աղետներ եւ այլն: Իսկ երբ Քրիստոսը երկրորդ անգամ երկիր կգա, բոլորը կիմանան ու կտեսնեն նրան:

Այն, որ վերջին շրջանում այս թեման ավելի հաճախ է քննարկվում, շահարկվում, քահանան նորմալ է համարում. Քրիստոսն է ասել, որ սուտ մարգարեներ կգան ու իր անունից մարգարեություններ կանեն:

Նրա խոսքերով` այս թեման շահարկողների թվում են նաեւ աղանդավորները, որոնց համար դա մարդ գրավելու միջոց է: Սարսափեցնում են, թե շուտով կյանքը կվերջանա, հետո փորձում են «փրկության ճանապարհը» ցույց տալ:

Տեր Բաբկենը նշեց նաեւ, որ պետք չէ վախենալ Քրիստոսի երկրորդ գալստից, այնպես, ինչպես մեզ չի սարսափեցնում ծերանալու ու մեռնելու միտքը. չէ՞ որ դա ընտրյալների համար հավիտենական կյանքը ժառանգելն է: