Ջոն Էվանսը կմասնակցի Հայ Դատի հանձնախմբի գիտաժողովին

Հայաստանում ԱՄՆ նախկին դեսպան Ջոն Էվանսը ելույթ կունենա ՀՅԴ Ամերիկայի Հայ Դատի գիտաժողովում, որը տեղի կունենա հունիսի 24-27-ը Վաշինգտոնի L'Enfant Plaza հյուրանոցում. տեղեկացնում է ԱՄՆ Հայ Դատի գրասենյակը:

Այդ կապակցությամբ հանձնախմբի գործադիր տնօրեն Արամ Համբարյանն ասել է. «Մենք շնորհակալություն ենք հայտնում դեսպան Ջոն Էվանսին ԱՄՆ-ի համար կատարած իր գործունեության,  հայ-ամերիկյան հարաբերությունների բարելավման գործում իր անզուգական ներդրման եւ Ամերիկայի հայ համայնքին հուզող հարցերում իր խելամիտ եւ մշտապես պատճառաբանված մասնակցության համար: Ինչպես միշտ` ակնկալում ենք լսել նրա կարծիքը եւ  համատեղ ելք փնտրել, հատկապես` մեր համայնքին հուզող հարցերում»: