"Գանձասարը" կլքի առաջնությունը

Մայիսի 19-ին կայացավ Հայաստանի ֆուտբոլի ֆեդերացիայի կարգապահական կոմիտեի հերթական նիստը` ՀՖՖ Կարգապահական կոմիտեի նախագահ Ռուբեն Սինոյանի նախագահությամբ և որոշվեց, որ Կապանի «Գանձասարը» տնային 5 հանդիպումները պետք է անցկացնի առանց հանդիսականների:

Ինչպես և սպասվում էր, պատիժը դժգոհության մեծ ալիք բարձրացրեց, թե' ակումբի ղեկավարության և  թե' երկրպագունների շրջանում: Տեղեկություններ կային, որ թիմի ղեկավարությունը որոշել է  դուրս գալ Հայաստանի առաջնությունից: 

«Գանձասարի» գլխավոր մարզիչ Աբրահամ Խաշմանյանը ArmSport.am-ի հետ զրույցում հաստատել է տեղեկատվությունը.
«Իրոք, թիմի հովանավոր Մաքսիմ Հակոբյանը այդպիսի որոշում է կայացրել, ինչի մասին ինձ տեղեկացրեց գործադիր տնօրեն Վլադիկ Առաքելյանը: Վաղը մենք պետք է մեկնեինք Երևան, որպեսզի նախապատրաստվեինք «Շիրակի»  հետ հանդիպմանը: Սակայն գործադիր տնօրենն  ասաց, որ մենք չենք մեկնելու Երևան, քանի որ թիմի հովանավորն որոշել է թիմը հանել առաջնությունից: Ինքս դեմ եմ առաջնությունից դուրս գալուն, քանի որ այս դեպքում  տուժում է սպորտային կողմը: Միաժամանակ, կարծում եմ, որ կարգապահական կոմիտեի որոշումն էլ չափազանց խիստ է, ինչն էլ ստիպել ՝  Հակոբյանին դիմելու այդպիսի քայլի»: