Պատվո բլուրը կհանձնեն Գյումրիի քաղաքային համայնքին

ՀՀ կառավարությունը վաղվա նիստում պատրաստվում է Գյումրիի «Պատվո բլուր» հուշահամալիրում տեղադրված` Կարսի ամրոցի գրավման ժամանակ զոհված ռուս զինվորներին նվիրված 117 մլն դրամ հաշվեկշռային արժեքով հուշակոթողը եւ հուշակոթողին հատկացված 0,92 հա հողատարածքը նվիրել քաղաքային համայնքին:

Շիրակի մարզպետին հանձնարարվելու է մեկամսյա ժամկետում ապահովել գույքի հանձնման-ընդունման աշխատանքների կատարումը եւ նվիրատվության պայմանագրի կնքումը: Հիշեցնենք, որ ամիսներ առաջ ՌԴ Ուլյանովսկի մարզի պետական գույքի եւ հողային հարաբերությունների դեպարտամենտի տնօրենի ու ՀՀ Շիրակի մարզպետի միջև կնքված հանձնման-ընդունման ակտով հուշակոթողը հանձնվել էր Շիրակի մարզպետարանին: