«Նորք» սոցիալական ծառայությունների տեխնոլոգիական և իրազեկման կենտրոնին գույք կհանձնեն

Կառավարության վաղվա նիստի օրակարգում աշխատանքի և սոցիալական ապահովության նախարարությունը ներառել է որոշում` «Նորք» սոցիալական ծառայությունների տեխնոլոգիական և իրազեկման կենտրոն» հիմնադրամին գույք հանձնելու և «Նորք» տեղեկատվավերլուծական կենտրոն» փակ բաժնետիրական ընկերությունը լուծարելու մասին:

Նախատեսվում  է թույլատրել «Նորք տեղեկատվավերլուծական կենտրոն» ՓԲԸ-ին, Երևանի Կարապետ Ուլնեցի 68 հասցեում գտնվող՝ բաժնային սեփականության իրավունքով իրեն պատկանող 0.11 հեկտար հողատարածքը և սեփականության իրավունքով  իրեն պատկանող 1544.7 քառ. մետր (որից 1.3 քառ. մետր պարիսպ) ընդհանուր մակերեսով անշարժ գույքը ինչպես նաև նյութական և ոչ նյութական ակտիվները անհատույց օտարել Հայաստանի Հանրապետությանը՝ ի դեմս Հայաստանի Հանրապետության կառավարությանն առընթեր պետական գույքի կառավարման վարչության:

 «Նորք» տեղեկատվավերլուծական կենտրոն» ՓԲԸ-ն իրականացնում է սոցիալական պաշտպանության ոլորտի տեղեկատվական համակարգերի վարումը, սպասարկումն ու շահագործումը, ինչպես նաև՝ զարգացումը:

Եվ քանի որ սոցիալական պաշտպանության ոլորտում գործող տեղեկատվական համակարգերի մեծ մասն ունեն արդիականացման և ժամանակակից տեխնոլոգիական պահանջներին ու ստանդարտներին համապատասխանեցման կարիք, ինչն էլ  պահանջում է որակյալ աշխատուժի առկայություն, և մրցունակ վարձատրություն, ուստի առաջարկվում է  խնդրի լուծման երկու տարբերակ. կամ կտրուկ ավելացնել ՀՀ պետական բյուջեից իրականացվող ֆինանսավորումը, կամ ձեռք բերել ֆինանսավորման այլընտրանքային աղբյուրներ:

Նախագծով  «Նորք» տեղեկատվավերլուծական կենտ­րոն ՓԲԸ-ի գործառույթները վերապահվում են ՀՀ կառավարության կողմից հիմնադրված՝ «Նորք» սոցիալական ծառայությունների տեխնոլոգիական և իրազեկման կենտրոն» հիմնադրամին,սեփականության իրավունքով «Նորք տեղեկատվավերլուծական կենտրոն» փակ բաժնետիրական ընկերությանը պատկանող անշարժ գույքն անհատույց օտարվում է պետությանը և անհատույց օգտագործման իրավունքով անժամկետ հանձնվում է «Նորք» սոցիալական ծառայությունների տեխնոլոգիական և իրազեկման կենտրոն» հիմնադրամին:

Նախագծի ընդունումը կապահովի սոցիալական պաշտպանության ոլորտի տեղեկատվական համակարգերի վարման, սպասարկման ու շահագործման աշխատանքների շարունակականությունը: