Կառավարության հերթական գլուխգործոցը

Կառավարությունը վերջերս «բացառիկ» որոշում ընդունեց. Արեւմտյան Հայաստանում եւ Օսմանյան Թուրքիայի այլ վայրերում մինչեւ 1915 թվականը (ներառյալ) ծնված եւ Հայոց ցեղասպանությունը վերապրածներին տալ 25 հազար դրամ ամենամսյա դրամական օգնություն:

Նախ հասկանալի չէ, թե ինչո՞ւ մինչեւ 15 թվականը, եթե Հայոց ցեղասպանությունը վերապրողներ են համարվում մինչեւ 1923 թվականը ծնվածները: Պաշտոնական տվյալներով` նրանց թիվը Հայաստանում այս տարվա հունվարի 1-ի դրությամբ 141-ն է: Այդ մարդկանց 25 հազարական դրամի հատկացումը պետբյուջեն ծանրացնելու էր ամսական ընդամենը 3 միլիոն 525 հազար դրամով:

Որոշումն ավելի անհեթեթ է թվում մի քանի ամիս առաջ վարչապետի համար ձեռք բերված նոր ծառայողական BMW-ի ֆոնին, որի արժեքը մոտ 100 հազար դոլար է:

Ակամայից հիշում ես լրագրողների հետ հանդիպման ժամանակ վարչապետի արտահայտած այն միտքը, որ ճգնաժամի շրջանում, եթե որևէ մեկը ձեռք է բերել թանկարժեք ավտոմեքենա, ուրեմն նրա ֆինանսական հնարավորությունը բավարար է այն մաքսազերծելու համար: Դրանով նա հիմնավորում էր ավտոմեքենաների մաքսազերծման գումարը չնվազեցնելու իր որոշումը:

Նույն տրամաբանությամբ, եթե այս շրջանում կառավարության ղեկավարը կարողանում է ձեռք բերել նման շքեղ մեքենա, ուրեմն բյուջեի միջոցները պետք է բավարարեին նաև նվազագույն աշխատավարձն ու թոշակները բարձրացնելու եւ կենսապահովման նվազագույնին հասցնելու համար: Իսկ ավտոմեքենայի արժեքը բավարար կլիներ առնվազն Ցեղասպանությունը վերապրածների փոխհատուցումը կրկնակի սահմանելու համար: Մանավանդ որ, վստահ ենք, պարոն Սարգսյանը այդ նոր մեքենայի հույսին չէր մնացել: