Կարտոֆիլն ու նարինջը նույն գնին են

Երեւանի մի շարք շուկաներում կարտոֆիլի գինը ռեկորդ է սահմանել` մեկ կիլոգրամի համար 450-500 դրամ:

Ի դեպ, նույն գնով կարելի է գնել նաեւ մեկ կիլոգրամ նարինջ, սակայն այդ միրգը ներկրվում է,  մինչդեռ Հայաստանը կարտոֆիլ արտադրող, ինչու չէ, նաեւ արտահանող երկիր է:

Բնակչության շրջանում խոսակցություններ են պտտվում, որ էկոլոգիապես մաքուր սնունդ համարվող կարտոֆիլի գները բարձրացրել են Հայաստան ներմուծվող գենետիկապես մոդիֆիկացված բանջարեղենի վաճառքն ապահովելու համար:

Գյուղատնտեսության փոխնախարար Սամվել Գալստյանին այս փաստը չի զարմացնում: Մեր թղթակցի հարցին պատասխանելով` նա ասաց. «Զարմանալու ի՞նչ կա: Անցած տարի կարտոֆիլի գինը նույնպես բարձր էր, այս տարի դեռ ցածր է: Անցած տարի վաղահաս կարտոֆիլը սկզբնապես վաճառվել է 650-700  դրամով»:

Փոխնախարարը չմոռացավ նաեւ ասել, որ անցած տարի Հայաստանն ունեցել է կարտոֆիլի պակասորդ, քանի որ կարտոֆիլի ցանքատարածքները զգալիորեն կրճատվել են: «Այս տարի ակնկալում ենք, որ ցանքատարածքները կավելանան եւ կունենանք  31 հազար հա ցանքատարածություն»,- նշեց նա:

Ի դեպ, շուկայում նախորդ տարվա` հին կարտոֆիլի գինն է տատանվում 450-500 դրամի սահմաններում,իսկ վաղահաս կարտոֆիլինը` 650-700 դրամ է եւ դեռ ավելին: