Մուբարաքի թոռանը հեռացրել են դպրոցից

Եգիպտոսի նախկին նախագահ Հոսնի Մուբարաքի թոռանը` Օմար Ալի Հոսնի Մուբարաքին, հեռացրել են դպրոցից «երկարատեւ բացակայության պատճառով»:

Եգիպտական մամուլը տեղեկացնում է, որ դպրոցի ղեկավարությունը նման որոշում է ընդունել` երեխայի ծնողներին ուղղված երկու նամակներին պատասխան չստանալով: Նամակներում տեղեկացնում էին, որ «Օմարի բացակայությունների թույլատրելի ժամկետը սպառվել է»:

Տղան դադարել է դպրոց հաճախել հունվարի 25-ից` Եգիպտոսում զանգվածային ցույցերի առաջին օրը: Օմարի մայրը, սակայն, փորձում է ուսումնական հաստատության ղեկավարությանը համոզել, որ տղային թույլ տան քննություններ հանձնել: Նա նշում է, որ երեխայի կյանքում ներկայումս բարդ ու ծանր իրավիճակ է, քանի որ նրա պապը, հայրը եւ հորեղբայրը բանտում են ու սպասում են դատավճռի: