Հաշմանդամները բոլորի պես կարող են աշխատել

Որեւէ տվյալ չկա, թե Հայաստանում գրանցված 180 հազար հաշմանդամներից քանիսն են աշխատունակ. այսօր Աշխատանքի իրավունքի պաշտպանության միջազգային օրվա կապակցությամբ հրավիրված ասուլիսի ժամանակ տեղեկացրեց «Ունիսոն» ՀԿ-ի նախագահ Արմեն Ալավերդյանը:

Նա ցավով նշեց, որ չի վերացել այն կարծրատիպը, թե հաշմանդամը չի կարող մյուսների հետ հավասար աշխատել:

Այս օրերին խորհրդարանում քննարկման է դրվել «Հաշմանդամների սոցիալական ներառման մասին» օրենքի նախագիծը, որում, ըստ բանախոսի, աշխատանքային զբաղվածությունը խթանող նորմեր կան, մասնավորապես` աշխատանքային քվոտաների մասին, որով բոլոր խոշոր ու միջին գործատուները կպարտավորվեն որոշակի թվով հաշմանդամներ աշխատանքի ընդունել:

«Ունիսոն»-ի հասարակայնության հետ կապերի պատասխանատու Մարինա Չալիկյանը տեղեկացրեց, որ իրենց մոտ գրանցված է աշխատանք փնտրող 300 հաշմանդամ. «Այդ մարդկանց մեջ կան նաեւ արհեստավորներ, սակայն գործատուներին թվում է` եթե մարդը հաշմանդամ է, միայն գրասենյակային աշխատանք կարող է կատարել»:

Ի դեպ, արդեն գործում է www.jobdisability.am կայքը, որտեղ հաշմանդամները կարող են գրանցվել ու աշխատանք գտնել: Կայքում գրանցվածների 8-9 տոկոսն արդեն աշխատանք է գտել: