Արաքսի ափերով

ՀՀ կառավարության որոշմամբ` Արաքս գետի ձախակողմյան ափի երկայնքով գետավազի արդյունահանումը թույլատրվում է հանքային իրավունք ունեցող այն կազմակերպություններին, որոնք կապահովեն ափապաշտպան ինժեներական կառույցների պահպանումը, վերականգնումը եւ նորերի կառուցումը` բացառելով գետի հունի խախտումը:

Հիշյալ որոշման հետ կապված` բնապահպան Կարինե Դանիելյանը «Երկիր»-ին հայտնեց, որ բնապահպանական հարցերը օրակարգում այնքան շատ են, որ ուղղակի չեն հասցնում շուտ բարձրաձայնել. «Արաքսի պաշտպանիչ շերտերի հենց կողքերին, այո', ավազային մեծ հանքեր: Մենք մի անգամ այդ հարցը բարձրացրինք, բայց պատասխան այդպես էլ չստացանք»:

Կ. Դանիելյանը նշեց նաեւ, որ այս հարցի կապակցությամբ տարիներ առաջ նույնիսկ Թուրքիան էր նոտա է հղել Հայաստանին:

«Մեր իշխանությունները չեն հասկանում, որ դրանով վտանգը կավելանա, Արաքսի հունը կփոխենք, ջուրը կբերենք մեր կողմ եւ լրացուցիչ տարածք կազատենք Թուրքիայի համար»,- նշեց բնապահպանը` հավելելով, որ չի հասկանում, թե ինչո՞ւ է իրենց` գործունեությունն այդքան անարդյունավետ. «Կարծում եմ` մենք` բնապահպաններս, դուրս ենք գալիս մեծ փողերի դեմ»: