Մուբարաքը տնային կալանքի տակ է

Եգիպտոսի նախկին նախագահ Հոսնի Մուբարաքը չի հասցրել լքել երկիրը եւ ներկայումս գտնվում է տնային կալանքի տակ:

Այս մասին հայտարարել են Եգիպտոսի զինված ուժերի գերագույն խորհրդի ներկայացուցիչները, ովքեր իշխանության են եկել Մուբարաքին գահընկեց անելուց հետո: Նրանք հերքել են այն տեղեկությունը, թե Մուբարաքը փախել է Եգիպտոսից եւ թաքնվել Սաուդյան Արաբիայում:

Եգիպտական խոշորագույն թերթերից «Ալ Ահրամը» գրում է, որ Մուբարաքի հետ տնային կալանքի տակ են նաեւ նրա ընտանիքի անդամները: Իսկ թե ի՞նչ միջոցներ են կիրառվում նախկին նախագահի եւ նրա բարեկամների նկատմամբ, չի պարզաբանվում:

Lenta.ru-ն գրում է, որ հայտնի է միայն, որ փետրվարի վերջին Մուբարաքին, նրա կնոջն ու երկու որդիներին արգելվել էր երկրից հեռանալ, սակայն տնային կալանքի մասին ոչինչ չէր ասվում:

Հոսնի Մուբարաքը Եգիպտոսի նախագահն էր շուրջ 30 տարի եւ այս տարվա փետրվարի 11-ին պաշտոնանկ արվեց եգիպտացի ընդդիմադիրների կողմից: Մարտին նրան կանչել էին հարցաքննության կոռուպցիայի կապակցությամբ հարուցված գործի վերաբերյալ: Մուբարաքի բոլոր ակտիվներն ու հաշիվները աշխարհի տարբեր բանկերում սառեցված են: