Ասադը բարեփոխումների մեծ ծրագիր է նախապատրաստել

Սիրիայի նախագահ Բաշար Ասադն այսօր դիմելու է ժողովրդին եւ իր ելույթում գնահատական է տալու երկրում տիրող իրավիճակին: Ինչպես տեղեկացրել է երկրի նախագահի պաշտոնական ներկայացուցիչ Բուսեյնա աս Շաաբանը, Ասադը ցանկանում է «քաղաքացիներին բացատրել ծրագրված բարեփոխումների նպատակը»:

Սիրիայի իշխանությունների կարեւորագույն քայլը կլինի արտակարգ դրության վերացումը, որը գործում է 1963 թվականից, երբ իշխանության եկավ Արաբական սոցիալիստական վերածննդի կուսկացությունը` «Բաաս»-ը:

Ներկայումս երկրի իշխանությունները բացեիբաց ընդունում են ցուցարարների պահանջների արդարացիությունն ու օրինականությունը եւ քաղաքական բարեփոխումների մեծ ծրագիր են մտադիր իրականացնել, որը նախատեսում է բազմակուսակցականություն, ԶԼՄ-ների մասին նոր օրենքի ընդունում, դատական բարեփոխումներ:

«Ալ Արաբիա»-ի տեղեկություններով`նախագահ Ասադը պատրաստվում է  մարտի 29-ին լուծարել կառավարությունը` հույս ունենալով այդպիսով վերջ դնել անկարգություններին:

Իրավապաշտպանների կարծիքով`արտակարգ դրության վերացումը հնարավորություն կտա ավելի քան 2 հազար քաղբանտարկյալների դուրս գալ բանտերից:

Ներկայումս ընդվզումների օջախներն են հարավային Դերաա քաղաքը եւ Լաթակիա նավահանգիստը, ուր անցյալ գիշեր զորքեր են մտցվել:

Amnesty International-ի տվյալներով` անցած շաբաթ տեղի ունեցած իրադարձությունների ընթացքում զոհվել է 50 մարդ, իշխանությունների տվյալներով` 27-ը: