Զինադադա՞ր, թե՞ բլեֆ

Ի պատասխան ՄԱԿ-ի Անվտանգության խորհրդի բանաձեւի, ըստ որի` Մուամար Քադաֆիի ռեժիմի նկատմամբ հնարավոր են ռազմական գործողություններ, Լիբիայի իշխանությունները որոշել են դադարեցնել ապստամբների դեմ զինված պայքարը. տեղեկացնում է «Ֆրանս պրես» գործակալությունը` վկայակոչելով Լիբիայի արտգործնախարար Մուսա Կուսային:

Իշխանությունների կողմից հայտարարված միակողմանի զինադադարի ժամկետների մասին ոչինչ չի հաղորդվում:

Կուսան վստահեցրել է, որ իրենք «չափազանց կարեւորում են քաղաքացիական բնակչության պաշտպանությունը», նաեւ խոստացել է, որ կապահովվի օտարերկրացիների անվտանգությունը:

Մինչդեռ Քադաֆիի վարչակարգի հակառակորդները հայտարարել են, որ զինադադարն իրենց համար նշանակություն չունի: «Քադաֆին բլեֆ է անում: Նա երբեք ճիշտ չի խոսում, ամբողջ աշխարհը գիտի, որ Քադաֆին ստախոս է»,- ասել է ապստամբների ղեկավարներից Խալիֆա Հեֆթիրը: