Ապրում ենք ապագայի վարդագույն լուրերով

Եթե հավատանք հայաստանյան պաշտոնական լրահոսին, ապա Հայաստանը վաղուց պետք է «Նյու Վասյուկի» դարձած լիներ: Այսպես` մոտ մեկուկես  տարի առաջ  «Արմավիա» ընկերությունը տեղեկացրեց , որ շատ շուտով չվերթեր կլինեն Երեւան-Լոս Անջելես-Երեւան ուղղությամբ: Միկա  Բաղդասարովն էլ իր անհասկանալի  առոգանությամբ ավետեց բաղձալի լուրը` եթե չեմ սխալվում Լոնդոնից:

Բնականաբար,  լուրը  մեծ ոգեւորությամբ հաղորդեցին բոլոր հեռուստաընկերությունները, տպագրեցին թերթերը, հրապարակեցին կայքերը: Եվ ինչ ոգեւորությամբ հրապարակեցին, նույն «ոգեւորությամբ» էլ մոռացան այդ մասին: Դե պարզ է՝ լավ լուրը, եթե նույնիսկ այն չկա, պետք է ստեղծել: Իսկ հետո ո՞վ է հիշելու դրա մասին: Կարեւորը մարդկանց հույս ներշնչելն ու նրանց հավատով պահելն է:

«Օրը կգա, բարին էլ հետը: Մի բան կմոգոնենք…»,- այսպես են մտածում  PR անողները եւ, ըստ  պաշտոնական կամ, այսպես ասած, կառավարելի լրահոսի` մեզ ուրախ եւ երջանիկ կյանք է սպասվում մոտ ապագայում, ասենք` վեց կամ ութ ամիս հետո: Իսկ երեք տարի հետոյի մասին էլ չենք խոսում. ասում են շատ լավ է լինելու:

Մեր կյանքը հիմա կառուցվում է ապագայի մասին լուրերով: Օրինակ` երբեք չես տեսնի մի ռեպորտաժ, որում կբարձրացվեն  սոցիալական ծանր խնդիրներ, եւ դրանք կհայտնվեն իշխանությունների ուշադրության կենտրոնում: Չկա նման խնդիր: Իսկ եթե կա էլ, այն արագ «լուծվում է»: Այսինքն՝ լուծում են, հետո հարցը բարձրացնում ու ցույց տալիս իրենց օպերատիվությունը: Բրավո, նայում ես ու հպարտությունից  ուզում ես պայթել: Բա այսքանից հետո արժե՞ բողոքել, թե մեզ մոտ վիճակը վատ է: Այսպես կարելի է ապրել ու ապրել: Հերն էլ անիծած, որ դժվարություններ կան: Չէ՞ որ դրանք հաղթահարելի են ու հաղթահարվելու են` հեռուստատեսություններն են ասում:

Իրենք ասում են, մենք էլ ամեն օր մի քանի ժամ հավատով լցվում ենք ու խաբվում: Եվ ամեն անգամ հենց զգում ես, որ խաբված ես, պարզվում է, որ  պաշտոնյային սխալ ենք հասկացել, որ ինքն այդպես չի ասել: Ու անցնում-գնում է:

Այս գործելաոճը դարձել է օրինաչափություն: Հենց այսպես էլ Երեւան-Լոս Անջելես-Երեւան  չվերթի սպասելիքով եւ մի լավ պարծենալով, որ մի օր մեր բակում էլ «երաժշտություն կլինի», ինքը՝ «երաժշտությունը», իր ոտքով մեր բակ եկավ Թուրքիայից:  Այսպես` ոչ ավել, ոչ պակաս Թուրքիայի կառավարությունը որոշել է վերահսկել Հայաստան կատարվող թռիչքները եւ, որպես առաջին քայլ, շուտով Երեւանում կբացի Turkish Airlines-ի գրասենյակ, որն էլ կկազմակերպի Երեւան-Ստամբուլ-Երևան չարտերային չվերթեր եւ հայ ուղեւորներին կտեղափոխի ԱՄՆ ու հակառակը:

Դե, հիմա ինչ տարբերություն, թե հարցը ով կամ ոնց է լուծում: Կարեւորը լուծվում է, չէ՞: Երեւի մենք ենք հերթական անգամ սխալ հասկացել, որ ազգային փոխադրողը  չվերթ է բացելու դեպի Լոս Անջելես: Կամ էլ ազգայինն ենք շփոթում:  Հաստատ: 

Հարություն ՀԱՐՈՒԹՅՈՒՆՅԱՆ