Կին եւ տղամարդ, թե՞ կին, թե տղամարդ

Մեր հասարակությունը տղամարդկային է, իսկ կանայք ընկալվում են որպես ազգը վերարտադրող, կրթող անձինք. այսօր լրագրողների հետ հանդիպման ժամանակ հայտարարեց «Հրապարակ» թերթի գլխավոր խմբագիր Արմինե Օհանյանը:

Իսկ երգչուհի Շուշան Պետրոսյանի կարծիքով`ամեն ինչ կախված է մարդու անհատականությունից, սակայն կան տղամարդիկ, ովքեր կնոջը դիտում են որպես իր, որը պետք է կատարի նրանց բոլոր ցանկությունները:

«Տղամարդը պետք է չկոտրի կնոջ անհատականությունը, կինն էլ պետք է սկզբունքային լինի. չէ որ կանանց ուսերին է դրված զինվոր դաստիարակելու բեռը»,- ասաց երգչուհին: Նա նաեւ կարեւորեց առաջին գծում ծառայող կանանց միշտ ուշադրության կենտրոնում պահելը:

Դրամատուրգ Կարինե Խոդիկյանը համարում է, որ մեր հասարակության մեջ կանանց եւ տղամարդկանց համար չկան հավասար պայմաններ, նա կատակով  նաեւ նշեց, որ պիեսներ է գրում, քանի որ իրեն չեն կարող անվանել դրամատուրգուհի:

«Հասարակության նորմալ զարգացման համար երկրում պետք է գործեն օրենքներ: Երկիրը պետք է լինի այն հարթակը, ուր տղամարդը լինի իր տեղում, այդ ժամանակ տղամարդիկ կգնահատեն նաեւ կանանց»,- ասաց Կ. Խոդիկյանը: