ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ. Քաղաքական եւ կրոնական "ճիշտ" ընտրություն

Հյուսիսային պողոտայում գտնվող «Կայլ» ռեստորանի մասին հրապարակումից հետո մեզ հաջողվեց նոր մանրամասներ պարզել: Փակ ակումբի սկզբունքով գործող ռեստորանը Հայաստանի համար աննախադեպ է նաեւ այն պատճառով, որ նույնիսկ իրենց` տարաշխարհիկ պահանջներին համապատասխանող այցելուներին ներս են թողնում միայն կոնտակտային տվյալները գրանցելուց հետո` անուն-ազգանուն եւ հեռախոսահամար:

Սկզբում հորինել են հատուկ դրես կոդ` առանց վայելուչ հագուկապի չի կարելի մտնել «Կայլ», հետո տեսան, որ առանց դրա էլ միայն «էլիտան» է մոտենում իրենց դռանը: Այդ ժամանակ հորինեցին այցելուների տվյալները գրանցելու պրակտիկան, բայց դա էլ չկասեցրեց «էլիտարների» երթը:

Այցելուներին չի խրտնեցում անգամ «Կայլի» կծող գնացուցակը: Առաջին այցելությունը` միայն սեղան պատվիրելու համար, խիստ թանկ է. սույնով այցելուն վերածվում է ակումբի անդամի` մուծելով 100 հազար դրամ անդամավճար:

Կարելի մտածել, որ ռեստորանի տերերն ամեն ինչ անում են ` հնարավորինս քիչ այցելու ունենալու համար, այսինքն` բիզնեսի օրենքներին հակառակ են աշխատում եւ ակնհայտորեն հետապնդում են այլ նպատակներ: «Էլիտար» այցելուներին ոչ միայն նման մանրուքները չեն մտահոգում, այլեւ «Կայլի» խորհուրդը մատնանշող մասոնական նշանները: «Էլիտան», ամենայն հավանականությամբ, կարծում է, որ եթե «Կայլ» է գնում վարչապետ Տիգրան Սարգսյանը, այն էլ` Արարատյան հայրապետական թեմի առաջնորդ Նավասարդ Կճոյանի ընկերակցությամբ, ուրեմն «Կայլ» գնալը քաղաքական եւ կրոնական «ճիշտ» ընտրություն է:

Թերթի տեղեկություններով` «Կայլի» ներքնահարկը ծառայում է որպես հավաքատեղի, հաջողվեց նաեւ ճշտել, որ սեփականատերը սփյուռքահայ է` Արմեն Գալստյան:

Ի դեպ, կարծիքներից մեկի համաձայն` Տիգրան Սարգսյանը «հոգնել է» վարչապետությունից, եւ շատ հնարավոր է` մասոնական շեղմամբ «Կայլ» ռեստորան-ակումբ հաճախում է հենց պաշտոնանկությունը սադրելու նպատակով: