ՀՅԴ-ն արտահերթ քննարկման է դնում գազի հարցը

Փետրվարի 25-ին ՀՀ Ազգային ժողովի տնտեսական հարցերի մշտական հանձնաժողովը բացասական եզրակացություն է տվել ՀՀ Ազգային ժողովի ՀՅԴ խմբակցության կողմից ներկայացված «Հայաստանի Հանրապետության գազամատակարարման համակարգի գործունեության ուսումնասիրության Ազգային ժողովի ժամանակավոր հանձնաժողով ստեղծելու մասին» ՀՀ Ազգային ժողովի որոշման նախագծին:

ԱԺ ՀՅԴ խմբակցությունը որոշում է կայացրել, օգտվելով ընդդիմադիր խմբակցությանը օրենքով ընձեռված հնարավորությունից, Ազգային ժողովի ս.թ. փետրվարի 28-ից մարտի 3-ի քառօրյա նիստերին ներկայացնել հարցը` արտահերթ քննարկման կարգով:

Հանձնաժողովի նպատակն է լինելու «գնահատել գազամատակարարման գործող համակարգի սոցիալական, տնտեսական, իրավական և բնագավառի պետական կարգավորման համապատասխանությունը ՀՀ Սահմանադրության 31.1 և 33.1 հոդվածների, դրանց հիման վրա ընդունված ոլորտի օրենսդրական պահանջներին, բացի այդ` գնահատել բնագավառում ստեղծված իրավիճակի ազդեցությունը ՀՀ կայուն զարգացման հեռանկարների վրա»:

ՀՅԴ-ն  առաջարկել է՝ ժամանակավոր հանձնաժողովին մաս կազմեն ԱԺ բոլոր խմբակցությունների ներկայացուցիչները, քանի որ առկա խնդիրները մտահոգում են նաև քաղաքական մեծամասնության պատգամավորներին, որոնք, սակայն, ելնելով քաղաքական դրդապատճառներից, խուսափում են պրոբլեմների բացահայտումից:

Ինչ վերաբերում է ՀՅԴ առաջարկին կոալիցիոն մեծամասնության արձագանքին, թե նման հանձնաժողովի ստեղծումն անիմաստ է, ՀՅԴ ԳՄ անդամ Սպարտակ Սեյրանյանը ասաց, որ շատ բնական երևույթ է. պետք է չէ՞ մի հիմնավորում բերեին՝ մերժելու համար. «Մենք արդեն սովոր ենք պարբերաբար լսել «անիմաստ է» արտահայտությունը, որ դարձրել են իրենց մշտական հիմնավորումը»: