Ցասման ալիքը Հայաստան կգա՞

Համաշխարհային հեղափոխական գործընթացները Հայաստանի հետ չկապելը «Նոր ժամանակներ» կուսակցության ղեկավար Արամ Կարապետյանը սխալ է համարում: Նրա խոսքերով` հուշագիր ստորագրած բոլոր կուսակցությունները պետք է մտածեն, թե ինչպես կարելի է Հայաստանում իշխանությունը անարյուն փոխանցել այլ քաղաքական ուժերի:

«Իմ անձնական դիտարկմամբ` արտաքին գործընթացները մարտին սաստկանալու են, իսկ դա թույլ է տալու հասկանալ, որ Հայաստանում ցասումն անխուսափելի է, այլ հարց է` արյունալի՞, թե՞ անարյուն»,- նշեց նա:

Հանրապետական Արտակ Զաքարյանն էլ հակադարձեց` ասելով, որ եթե Հայաստանում կան ընդդիմադիր ուժեր, որոնք հույսը դնում են տարբեր տեսակի խժդժությունների վրա, ապա նրանց հույսերը չեն իրականանա. «Եթե մեր ընդդիմությունը սպասում է, որ ժողովուրդը պետք է անպայման ցասման մեջ լինի, որ իրեն ձայն տա, դա նշանակում է, որ մեր ընդդիմությունը միայն որպես ընդդիմություն գոյություն ունի: Ես խորհուրդ եմ տալիս մեր ընդդիմադիրներին` մի' սպասեք` ցասման ալիքը Հայաստան չի գա»: