ՀՐԱՊԱՐԱԿ. 4-8 դոլարի հանելուկը դեռ չի պարզվել

Թուրքիայից եւ Չինաստանից ապրանք բերող առեւտրականները, որ մի քանի օր շարունակ կառավարության մոտ բողոքի ակցիա էին անում` մեկ կիլոգրամ հագուստի դիմաց վճարվող մաքսատուրքը բարձրացնելու հետ կապված, այսօր նորից վերսկսելու են բողոքի ակցիաները, քանի որ իրենց խնդիրն այդպես էլ լուծում չի ստացել:

Հիշեցնենք. պարզվեց, որ ներմուծվող ապրանքի մաքսազերծման համար նախատեսված գումարի կրկնակի թանկացման մեղավորը բեռնափոխադրմամբ զբաղվող մասնավոր ընկերություններն են, որոնք գինը 4 դոլարից բարձրացրել են 8-ի: Բարձրացված աղմուկից հետո այդ ընկերություններից մեկի տնօրենը` ոմն Կառլեն, հեռուստատեսությամբ հայտարարել էր, որ ոչ մի թանկացում էլ չկա, եւ առեւտրականները կշարունակեն ապրանքը փոխադրել նախկինի պես` 4 դոլարով: Սակայն երեկ, երբ առեւտրականները գնացել են մաքսատուն` ապրանքը ստանալու, անակնկալի են եկել: Նրանցից յուրաքանչյուր 1 կիլոգրամի համար պահանջել են վճարել 8 դոլար, լավագույն դեպքում առաջարկել են համաձայնության գալ 6 դոլարի շուրջ:

Առեւտրականները չեն համաձայնել, եւ այսօր ժամը 12-ին նրանք հավաքվելու են նախագահականի դիմաց եւ պահանջելու են վերջնականապես լուծել այս հանելուկը` ի վերջո, ով է այս թանկացման պատասխանատուն եւ որն է դրա պատճառը: