Քննարկվել են գյուղատնտեսության արդյունավետության բարձրացման խնդիրները

Այսօր կառավարությունում տեղի է ունեցել խորհրդակցություն ՀՀ գյուղատնտեսության ոլորտի արդյունավետության բարձրացման վերաբերյալ, որը վարել է վարչապետ Տիգրան Սարգսյանը: Խորհրդակցությանը մասնակցում էին գյուղատնտեսության նախարարը, նախարարների տեղակալներ, գերատեսչությունների ղեկավարներ, մարզպետներ, Հանրային խորհրդի անդամներ, շահագրգիռ կառույցների ներկայացուցիչներ:

Մինչ քննարկումն սկսելը վարչապետն ընդգծել է, որ խորհրդակցությունը նվիրված է 2011թ. գյուղատնտեսական աշխատանքների, մասնավորապես գարնանացանի կազմակերպման խնդիրներին:

Օրակարգային մի շարք հարցերի առնչությամբ զեկուցումներով են հանդես եկել գյուղատնտեսության նախարարի տեղակալները:
Մասնավորապես, գյուղատնտեսության նախարարի տեղակալ Սամվել Գալստյանը զեկուցել է գարնան գյուղատնտեսական աշխատանքների նախապատրաստման ընթացքի մասին: Խոսելով ցանքատարածություններում առկա վիճակի ու վարելահողերի կրճատման պատճառների մասին` նա անդրադարձել է աշնանացանի պակասը մեղմելու նպատակով գարնանացանի ծավալի ավելացման հնարավորություններին եւ առաջարկվող մեխանիզմներին: Ներկայացվել են կրծողների դեմ պայքարի եւ խորհրդատվական ծառայությունների ակտիվացման ուղղությամբ իրականացված աշխատանքների արդյունքները:

Գյուղացիական տնտեսությունների շրջանառու միջոցների համալրման նպատակով վարկավորման արդյունքների վերաբերյալ զեկուցումով հանդես է եկել  գյուղատնտեսության նախարարի առաջին տեղակալ Սամվել Ավետիսյանը: Հարցի առնչությամբ վարչապետ Սարգսյանը հանձնարարել է տեղեկատվություն ներկայացնել ոլորտում արձանագրված զարգացումների մասին։

Մեկ այլ հարցով գյուղատնտեսության նախարար Սերգո Կարապետյանը զեկուցել է մթերող կազմակերպությունների կողմից մթերված հումքի դիմաց վճարումների ընթացքի մասին եւս:

Գյուղատնտեսության նախարարի առաջին տեղակալ Սամվել Ավետիսյանը ներկայացրել է ՀՀ-ում գյուղացիական տնտեսությունների խոշորացման հայեցակարգի նախագիծը` իր զեկույցում անդրադառնալով խոշորացման հիմնական ուղղություններին: Նշվել է, որ հայեցակարգի նախագիծն ուղարկվել է բոլոր մարզպետներին: Հանձնարարվել է հայեցակարգի վերաբերյալ բոլոր առաջարկությունները ներկայացնել ՀՀ գյուղատնտեսության նախարարություն:

Օրակարգային հարցերի թվում դրամաշնորհային տեխնիկայի բաշխման ընթացքի առնչությամբ զեկուցումով հանդես է եկել գյուղատնտեսության նախարարի տեղակալ Վարդան Կարապետյանը: 2011թ. ոռոգման սեզոնի կազմակերպման վերաբերյալ մանրամասներ է ներկայացրել ՀՀ տարածքային կառավարման նախարարության ջրային տնտեսության պետական կոմիտեի նախագահ Անդրանիկ Անդրեասյանը:

Ամփոփելով քննարկման արդյունքները` կառավարության ղեկավարը համապատասխան հանձնարարականներ է տվել պատասխանատու գերատեսչությունների ղեկավարներին եւ ընդգծել գյուղատնտեսության նախարարության եւ մարզպետարանների միջեւ մշտական երկխոսության ապահովման կարեւորությունը. «2011թ. համար գյուղատնտեսությունը  գերակա  ոլորտ է լինելու, եւ մենք պետք է լրջագույն ջանքեր ներդնենք,  որպեսզի ապահովենք ընթացիկ աշխատանքները եւ աճ ունենանք»: