Հրապարակվել են ՉԹՕ-ների մասին պատմող ռազմական արխիվները

Ջուլիան Ասանժի քաջագործությունից ոգեւշնչված` Նոր Զելանդիայի զինված ուժերի հրամանատարությունը թույլատրել է ինտերնետային ցանցում զետեղել ՉԹՕ-ների մասին պատմող գաղտնի փաստաթղթեր: Դրանցում նկարագրված են չճանաչված թռչող օբյեկտների հետ հանդիպման փաստեր ու դիտարկումներ: Տեղեկատվական կայքերից մեկը ներկայացրել է 1954-2009թթ. ընթացքում հավաքված ավելի քան 2000 էջ: Փաստաթղեթրի մեծ մասը պատմում է մարտական ու քաղաքացիական օդաչուների` տարօրինակ թռչող օբյեկտների հետ ունեցած հանդիպումների մասին: Հաճախ դրանք եղել են անբացատրելի կրակներ: Պատահել է այնպես, որ լուսատու սկավառակները մերթ հայտնվել, մերթ անհետացել են, իսկ հետո հանկարծ լուսարձակել երկնքի մեկ այլ հատվածում: Դրանք նաեւ «հետապնդել» են ինքնաթիռներին, ուղեկցել մինչեւ օդանավակայան: Հրապարակված փաստաթղթերի մեջ կան նաեւ թռչող ափսեների գծագրեր, որոնց հեղինակ ինժեներները պնդել են, թե այլմոլորակային օդանավերի կառուցվածքը հասկացել են «իրենց հայտնի նշաններով»:

Մոտ 300 էջեր ներկայացնում են ավելի քան 20 տարի այլմոլորակայինների հետ շփումներ ունեցած նորզելանդացի մի տղամարդու հաշվետվությունը:

Փաստաթղթերի գաղտնազերծումը հնարավոր դարձավ ՉԹՕ-ներ հետազոտողների ու լրագրողների շնորհիվ, ովքեր երկու տարուց ավելի մշտապես ճնշում են գործադրել զինվորականների վրա: