Իլինգի քաղաքապետարանի կողմից Հայոց ցեղասպանության ճանաչումը ամբողջ համայնքի ձեռքբերումն է

Կարեւոր է, որ Լոնդոնի Իլինգ թաղամասի ավագանու խորհրդի կողմից Հայոց ցեղասպանության ճանաչումը համարվի ձեռքբերում ամբողջ հայ համայնքի համար, «Ազատություն» ռադիոկայանին ասել է խորհրդի հայազգի անդամ Արա Իսկանդերյանը:

Հարցին, թե Իլինգի ավագանու խորհրդի որոշումը ի՞նչ կարեւորություն կարող է ունենալ բրիտանական այլ կառույցներում Հայոց ցեղասպանության ճանաչման գործընթացի համար, Իսկանդերյանը պատասխանեց, թե հետագա հետեւանքներն ու քայլերը իր նպատակներից դուրս են, եւ ինքը չի կարող պատասխանատվություն կրել այլ նախաձեռնությունների համար:

Իսկանդերյանի առաջարկով դեկտեմբերի 14-ին Իլինգը պաշտոնապես ճանաչեց Հայոց ցեղասպանությունն ու թույլատրեց հուշագիր տեղադրել այս գարնանը ցեղասպանության զոհերի հիշատակին Լոնդոնի այս թաղամասում տնկված ծիրանենու մոտ: Մինչ այժմ Մեծ Բրիտանիայում միայն Ուլեսի խորհրդարանն էր պաշտոնապես ճանաչել Հայոց ցեղասպանությունը:

Իսկանդերյանի առաջարկին կողմ էին քվեարկել մեծամասնություն կազմող լեյբորիստներն ու 5 ներկայացուցիչ ունեցող լիբերալ դեմոկրատները: Խորհրդում 24 անդամ ունեցող Պահպանողական կուսակցության անդամները առաջարկել էին խմբագրել հուշագիրը, սակայն նախաձեռնության հեղինակները չէին համաձայնել, եւ արդյունքում պահպանողականները դեմ էին քվեարկել:

Արա Իսկանդերյանը չցանկացավ նշել պահպանողականների առաջարկի բովանդակությունը, բայց կարեւորեց, որ նրանք, փոքրամասնություն լինելով, չէին կարող տապալել քվեարկությունը:

Իլինգը Լոնդոնի արեւմտյան թաղամասերից է, որտեղ մոտ 15 հազար հայ է բնակվում, եւ Իսկանդերյանը համարում է, որ հաստատվել է հայկական համայնքի իրավունքը` պաշտոնապես եւ բացահայտորեն հիշելու ցեղասպանության զոհերին:

«Թուրքական համայնքի կողմից դեռեւս որեւէ արձագանք չի եղել: Հնարավոր է, որ դեռ առաջին օրերն են, եւ գուցե արձագանքը լինի ավելի ուշ: Բայց ես ուզում եմ շեշտել, որ սա քաղաքական քայլ չէր ու նպատակ չուներ խնդիրներ առաջացնել Բրիտանիայի հայերի ու թուրքերի միջեւ: Եվ ես ուզում եմ հուսալ, որ այս համայնքում, որտեղ բավական հայեր կան, մեր միջնորդությունն ու խորհրդի որոշումը ճիշտ կընկալվի»,- ասել է Իսկանդերյանը:

Երիտասարդ հայ գործիչը կարեւորում է, որ այս քայլը համարվի ձեռքբերում ամբողջ հայ համայնքի համար ու չվերագրվի որեւէ հայկական կազմակերպության կամ կուսակցության, ինչը, նրա խոսքով, ոմանք փորձում են անել:

«Որեւէ տեղ, ուր հայեր կան աշխարհում, կան կազմակերպություններ, որոնք փորձում են ներկայանալ ամբողջ համայնքի անունից: Շատ կարեւոր է հիշել, որ սա արվել է` հարգելու ամբողջ համայնքի հիշողությունն ու պատմությունը: Եվ իհարկե, պետք չէ մոռանալ, որ սա Լեյբորիստական կուսակցության նախաձեռնությունն էր», - ընդգծեց Իսկանդերյանը:

Հունվարի 28-ը Մեծ Բրիտանիայում նշվում է որպես Հոլոքոսթի հիշատակության օր: Հենց այդ օրը Ցեղասպանության զոհերի հիշատակին տնկված ծիրանենու մոտ նախատեսվում է տեղադրել հուշագիրը:

Արա Իսկանդերյանի խոսքով` ավելի ուշ իրենք նախատեսում են հայ համայնքի անունից շնորհակալական նվեր մատուցել Իլինգ թաղամասին: Ամենայն հավանականությամբ, դա կլինի փայտե նստարան` շնորհակալական գրությամբ: