Հանցագործությունների թիվն աճել է

2010-ի վերջին 11 ամիսների ընթացքում ՀՀ ոստիկանության կատարած աշխատանքների վերաբերյալ այսօր լրագրողների հետ հանդիպման ժամանակ խոսեց ՀՀ ոստիկանապետի տեղակալ, գեներալ-մայոր Հունան Պողոսյանը:

«Ընդհանուր առմամբ, ոստիկանությունը կատարել է իր առջեւ դրված խնդիրները, օրենքով վերապահված լիազորությունների շրջանակներում ձեռնարկված  միջոցառումների շնորհիվ` հանրապետությունում լիովին վերահսկվել է օպերատիվ իրավիճակը, ինչի արդյունքում պահպանվել է կայուն հասարակական կարգ»,- ասաց փոխոստիկանապետը:

Նա նշեց, որ այս տարվա ընթացքում արձանագրված հանձագործությունների թիվը անցյալ տարվա համեմատությամբ աճել է մոտ 8.8 տոկոսով: Անցյալ տարի այս թիվը 11864 է, իսկ այս տարի` 12914: Սակայն այս աճը բացատրվում է նրանով, որ նվազել են անօրինական ճանապարհով հանձագործությունները գաղտնի պահելու եւ չբացահայտելու դեպքերը:

Յուրաքանչյուր 100 հազար բնակչի դեպքում հանձագործությունների գործակիցը եղել է 433 դեպք, ինչը նախորդ տարվա համեմատությամբ աճել է 34-ով:

Հանցագործությունների գործակիցը բարձր է Երեւանում (613), Լոռու մարզում (436), ցածր է Գեղարքունիքի (263) եւ Արագածոտնի (293) մարզերում:

Աճ է գրանցվել առանձնապես ծանր հանցագործությունների թվաքանակում: Նախորդ տարի գրանցվել է 277, իսկ այս տարի` 340 դեպք: Իսկ ծանր հանձագործությունների դեպքում թիվը նվազել է 70-ով. անցյալ տարի գրանցվել է 4630, իսկ այս տարի` 4560 դեպք:

Նվազել են սպանությունների դեպքերը: Անցյալ տարի գրնցվել է սպանության 73, իսկ այս տարի 42 դեպք: Նվազել են նաեւ գողության եւ ավազակության դեպքերը, այնինչ աճ է գրանցվել բնակարանային գողությունների եւ խարդախության դեպքերի:

Այս տարի ապօրինի զենք պահելու ուղղությամբ ոստիկանության աշխատանքների շնորհիվ առգրավվել է մոտ 976 հրազենային միավոր:

Նվազել են նաեւ  անչափահասների կողմից արձանագրված հանցագործության դեպքերը: