ԿԱՊԻՏԱԼ. Սփյուռքի ընտրական մարմնի ստեղծումը չպետք է հակասի Հայաստանի շահերին

Մեր կուսակցության մոտեցումների համաձայն՝ Սփյուռքի ընտրական մարմնի ստեղծումը չպետք է հակասի Հայաստանի շահերին եւ պետք է հաշվի առնի դրա գոյությունը: «ԱրմԻնֆո» գործակալությանն այդպիսի կարծիք է հայտնել ՀՅԴ Հայ դատի կենտրոնական գրասենյակի քաղաքական հարցերի պատասխանատու Կիրո Մանոյանը` մեկնաբանելով Սփյուռքի ընտրական մարմնի ստեղծման վերաբերյալ Հարութ Սասունյանի առաջարկությունը:

«Սասունյանը նույնպես ՀՅԴ անդամ է, եւ նրա կարծիքը ԱՄՆ-ում Սփյուռքի կազմակերպման հարցերի քննարկմանը նվիրված գիտաժողովի բոլոր մասնակիցների կարծիքի արտահայտումն էր: Իսկ ՀՅԴ Բյուրոյի ներկայացուցիչ Հրանտ Մարգարյանի արտահայտած տեսակետը հենց այդ նպատակներն է հետապնդում, քանի որ մենք անթույլատրելի ենք համարում բոլոր այն քայլերը, որոնք բաժանիչ գծեր կստեղծեն Հայաստանի եւ Սփյուռքի միջեւ»,- նշել է նա:

Քաղաքական գործչի կարծիքով՝ բոլոր այդ քայլերը պետք է ձեռնարկվեն բացառապես համատեղ ջանքերով, այդ թվում` Հայաստանի երկպալատ խորհրդարանի ստեղծումը, ինչը ենթադրում է ընտրությունների անցկացում նաեւ Սփյուռքում:

«Այդպիսով՝ մակերեւույթին մնացող գլխավոր հարցն այն է, թե ինչպես կանցկացվեն ընտրությունները Սփյուռքում, քանի որ Սփյուռքը ներհամայնքային ընտրությունների անցկացման փորձ չունի: Ամեն դեպքում, այդ գաղափարների իրագործումը հնարավոր է միայն Հայաստանի եւ Սփյուռքի լիակատար համախոհության պայմանով, հակառակ դեպքում դա, պարզապես, անհնար կլինի»,- ասել է Մանոյանը: