Ժաննայի ու Հրաչյայի ուղեցույցը կամ ինչպես կարելի է միջակ գիտելիքներով ստանալ 840,000 դրամ կրթաթոշակ

Վերջին տարիների ագրարային համալսարանի ընդունելության ողբալի ֆոնին ԿԳՄՍ նախարար Ժաննա Անդրեասյանը չի ալարում խոսել ագրարայինը փրկելու իր իրականացրած ծրագրի, այն է՝ ուսանողներին ամսական 70000 կրթաթոշակ տրամադրելու մասին։ Սրան զուգահեռ տեղի-անտեղի ագրարայինի «աննախադեպ» կրթական որակի մասին է գոռում-գոչում ռեկտոր Հրաչյա Զաքոյանը։

Միասնական ընդունելության քննությունների բոլոր փուլերում ագրարայինի 16 մասնագիտության գծով առկա բակալավրի համակարգ 2025-2026 ուստարում ընդունվել է, ուշադրություն, ընդամենը 33 դիմորդ։ 

Սա տարիների ձգվող տրագիկոմեդիայի պատկերն է բացարձակ թվերով։ Առավել սարսափելի է բովանդակային կողմը։

Yerkir.am-ը ուսումնասիրել է ընդունված 33 դիմորդի երկու միասնական քննության  գնահատականները։ 33 դիմորդից և ոչ մեկը չի ընդունվել «գերազանց» գնահատականներով։ 

Նրանցից 4-ը կամ 12 տոկոսը ստացել են «լավ» գնահատականներ, իսկ 29-ը կամ 88 տոկոսը բուհ են ընդունվել «բավարար» գնահատականներով։

Ստացվում է, որ ԿԳՄՍ նախարարությունն ու բուհը իրականում ոչ թե բարելավում են ընդունելության գործընթացն ու բարձրացնում որակը, այլ հարկատուների հաշվին 1 ուսանողի հաշվով տարեկան 840 000 դրամով խրախուսում միջակ գիտելիքներ ունեցող ուսանողներին։