Էյֆելյան աշտարակը կուղղի պատմական բացթողումը՝ 72 կին գիտնականների անունները կավելացվեն 72 տղամարդկանց անուններին

Գուստավ Էյֆելի նախագծած հայտնի հուշարձանը՝ Էյֆելյան աշտարակը, զարդարված է ոսկե տառերով փորագրված գիտնականների 72 անուններով, որոնք բոլորն էլ տղամարդիկ են, գրում է Phys. Org.-ը։

Ավելի քան 130 տարի անց Փարիզ քաղաքը որոշել է շտկել պատմական բացթողումը՝ ավելացնելով գիտության և տեխնոլոգիայի մեջ նշանակալի ներդրում ունեցած 72 ականավոր կանանց անուններ։

«Կանայք և գիտություններ» ասոցիացիայի փոխնախագահ, աստղաֆիզիկոս Իզաբել Վոգլենի և Էյֆելյան աշտարակը շահագործող ընկերության ղեկավար Ժան-Ֆրանսուա Մարտինսի գլխավորած փորձագետների հանձնաժողովը 2025 թվականի սեպտեմբերի 5-ին իր առաջարկությունները ներկայացրել է Փարիզի քաղաքապետ Անն Իդալգոյին։

Նախաձեռնության նպատակն է ընդգծել կանանց պատմական ներդրումը գիտության և տեխնոլոգիայի մեջ և պայքարել «Մատիլդայի էֆեկտի» դեմ՝ տերմին, որը 1993 թվականին հորինել է ամերիկացի պատմաբան Մարգարետ Ռոսիտերը և վերաբերում է գիտության մեջ կանանց նվաճումների համակարգված թերագնահատմանը։

Թեկնածուներ ընտրելիս հանձնաժողովը առաջարկեց սահմանափակել ցուցակը ճանաչված կին մասնագետների՝ մահացած և հիմնականում ֆրանսիական ծագում ունեցող, որոնք ընդգրկում են 1789 թվականից մինչև մեր օրերը ընկած ժամանակահատվածը։

Սեռական հավասարությունն ապահովելու համար որոշվեց կանանց անունները տեղադրել տղամարդկանց անուններով առկա ֆրիզի անմիջապես վերևում։

Անունների վերջնական ցուցակը քաղաքապետին կներկայացվի այս տարվա վերջին, և այն կհաստատի Աննա Իդալգոն։

Էյֆելյան աշտարակը, որը Փարիզ քաղաքին է պատկանում և աշխարհի ամենաշատ այցելվող տեսարժան վայրերից մեկն է, տարեկան գրավում է մոտ յոթ միլիոն զբոսաշրջիկ, որոնց մոտ երեք քառորդը օտարերկրացիներ են։