Էյֆելյան աշտարակը` երաժշտական գործիք

Էյֆելյան աշտարակի կառավարիչ ընկերությունը թույլատրել է նյույորքցի կոմպոզիտոր Ջոզեֆ Բերտոլոցիին Փարիզի խորհրդանիշն օգտագործել որպես երաժշտական գործիք.  տեղեկացնում է The New York Times-ը:

Բերտոլոցին գրանցելու է այն հնչյունները, որոնք արձակվելու են աշտարակը` որպես պերկուսիա օգտագործելիս, այնուհետեւ դրանցից ստեղծվելու է երաժշտական կոմպոզիցիա: Կոմպոզիտորի վերջնական նպատակը այդ գործի կենդանի կատարումն է աշտարակում:

Բերտոլոցին առաջին անգամ չէ, որ ճարտարապետական կառույցն օգտագործում է որպես հարվածային գործիք: Ավելի վաղ նա հնչյուններ է «կորզել» Հուդզոն գետի Ֆրանկլին Ռուզվելտ կամրջից:

Կոմպոզիտորն արդեն հանգանակություն է սկսել իր համերգի համար, որը մտադիր է իրականություն դարձնել 2014 թվականին, երբ կնշվի Էյֆելյան աշտարակի 125-ամյակը: