Իրանի արձագանքն ադրբեջանա-թուրքական նախագծին՝ «Զանգեզուրի միջանցք»-ին հայտնի է․ իրանցի լրագրող

«Մենք գիտենք Իրանի արձագանքն ադրբեջանա-թուրքական նախագծին, այսպես կոչված, «Զանգեզուրի միջանցք»-ին»։ Այս մասին ապրիլի 3-ին լրագրողների հետ զրույցում հայտարարեց միջազգային լրագրող Աբբաս Ջուման։

Նա հիշեցրեց, որ Իրանի համար սա կարմիր գիծ է, և այս առումով Հայաստանն ու Իրանը նույն ճանապարհին են։

Ջուման նշեց, որ Իրանը միշտ դրական դիրքորոշում է ցուցաբերել հայ հասարակության, Հայաստանի և հայկական քաղաքականության նկատմամբ։

«Իրանը միշտ հայության մեջ աջակցություն է գտել առօրյա, տնտեսական և քաղաքական մակարդակներում։ Հայաստանն ու Իրանը բարեկամներ են, որոնց հարաբերությունները ավելի քան երկուսուկես հազար տարվա վաղեմություն ունեն։ Այսօր նրանք հաստատել են ամենասերտ կապը՝ մտավոր, քաղաքական և տնտեսական, այդ թվում՝ շուկան, անվտանգության ոլորտը, ընդհանուր տարածաշրջանային շահերը, ընդհանուր սպառնալիքները»,- ընդգծեց լրագրողը։