Տանը մահացած են գտել ԱՄՆ նախկին դաշնային դատախազին

ԱՄՆ նախկին դաշնային դատախազին մահացած են գտել շաբաթ առավոտյան Վիրջինիա նահանգի Ալեքսանդրիա քաղաքի տանը, հայտնում է CBS News-ը՝ հղում անելով իշխանություններին։

Ալեքսանդրիայի ոստիկանական բաժանմունքի աշխատակիցները տուն են եկել առավոտյան ժամը 9:18-ին այն բանից հետո, երբ հաղորդում են ստացել, որ կինը չի պատասխանում զանգերին: Ոստիկանությունը հայտնել է, որ երբ հասել են դեպքի վայր, 43-ամյա Ջեսիկա Էյբերին՝ Վիրջինիայի Արևելյան շրջանի նախկին դատախազին, մահացած են գտել:

Առայժմ հայտնի չէ՝ տունը պատկանե՞լ է Էյբերին, և ով է դիմել ոստիկանություն։ Նրա մահվան պատճառը կպարզի Վիրջինիա նահանգի դատաբժշկական փորձաքննությունը։ Այլ մանրամասներ չեն հաղորդվել:

Նախկին նախագահ Ջո Բայդենը Էյբերի թեկնածությունն այդ պաշտոնում առաջադրել էր 2021 թվականի օգոստոսին, և նա միաձայն հաստատվել էր Սենատի կողմից:

Նա ղեկավարել է վարչությունը մոտ երեք տարի։ Հունվարին, երբ սկսվել է նախագահ Թրամփի երկրորդ ժամկետը, նա հրաժարական է տվել:

Էյբերը զբաղվում էր մասնավոր պրակտիկայով՝ նախքան 2009 թվականին Վիրջինիայի Արևելյան շրջան գալը, որտեղ նա զբաղեցրել է մի քանի, այդ թվում՝ ԱՄՆ դատախազի օգնականի և դեպարտամենտի քրեական բաժնի պետի տեղակալի պաշտոնները, ասված է Արդարադատության նախարարության կայքում: Լինելով ԱՄՆ դատախազ, նա գլխավորում էր մոտ 300 հոգուց բաղկացած անձնակազմը մի շրջանում, որը սպասարկում է մոտ վեց միլիոն բնակչի:

Ծնունդով Վիրջինիայից՝ Էյբերը բակալավրի աստիճանը ստացել է Ռիչմոնդի համալսարանում, և 2006 թվականին Ուիլյամ և Մերի իրավաբանական դպրոցում ստացել իրավաբանի աստիճան: