Սահմանամերձ համայնքներն ուժեղացնելու փոխարեն՝ օրվա իշխանություններն ավելացնում են արտագաղթի հիմքերը ․ Ղազարյան

«Հարգելի հայրենակիցներ, Բազմիցս եմ անդրադարձել Հայաստանի տարբեր համայնքներում անհամաչափ զարգացման խորացող խնդիրներին, դրանց անհաշվարկ ու անհիմն դրսևորումներին և անխուսափելի դարձած բացասական հետևանքներին։

Օրվա իշխանությունները օպտիմալացման անվան տակ փակում և կրճատում են հանրային կյանքի բնականոն ապահովման համար տարիներ շարունակ գործող հաստատությունները։

Փոքր գումարների խնայողության մոլուցքով տարված և իրենց նեղ քաղաքական հաշվարկներից ելնելով՝ ավելի են դժվարացնում հատկապես՝ հեռավոր և սահմանամերձ բնակավայրերի բնակչության կենսական պայմանները։

Այս անգամ անդրադառնալու եմ Վարդենիս խոշորացված համայնքին, որի մշտական բնակչության թիվը կազմում է շուրջ 40 հազար։ Ի դեպ, վերջին պատերազմական գործողությունների հետևանքով համայնքի մի շարք բնակավայրեր դարձել են սահմանապահ, սակայն չեն ընդգրկվել կառավարության կողմից հաստատված աջակցության ծրագրերից, այդ թվում՝ Փամբակ, Դարանակ, Արեգունի, Գեղամասար, Ավազան, Արփունք, Կախակն, Կուտական, Տրետուկ և Ախպրաձոր բնակավայրերը։

Համայնքում փակվել են անձնագրային և ԴԱՀԿ ծառայության տարածքային բաժանմունքները։ Վարդենիս քաղաքը համայնքի սահմանամերձ գյուղական բնակավայրերին կապող հանրային տրանսպորտ չի գործում։ Երեք տարի շարունակ չի գործում դիահերձարանը։

Վարդենիս համայնքի միակ հիվանդանոցը այդպես էլ չի համալրվում նվազագույն անհրաժեշտ բուժսարքավորումներով և մասնագետներով։

Տարիներ շարունակ չհամալրված են մնում հանրակրթական ուսումնական հաստատությունների մանկավարժական թափուր հաստիքները։ Ավելին՝ օպտիմալացման անվան տակ փաստացի փակման գործընթացում են գտնվում Վարդենիս համայնքի Կութի, Ազատի, Նորաբակի, Ջաղացաձորի, Գեղամաբակի, Կուտականի, Տրետուքի, Փամբակի, Լճավանի, Աղբրաձորի, Ավազանի միջնակարգ դպրոցները։

Փաստորեն, համայնքի բնակիչները ստիպված են լինում լրացուցիչ ժամանակ և ծախսեր կատարել վերը նշված առաջին անհրաժեշտության ծառայությունները ստանալու համար՝ ամեն անգամ անցնել 30-40 կիլոմետր ճանապարհ, սպասել երկար հերթերում և ենթարկվել այլ անհարմարությունների։

Այս ամենը էական բացասական հետևանքներ է ունենում տեղի բնակչության կյանքի որակի վրա։

Փաստորեն, սահմանամերձ համայնքներն ուժեղացնելու փոխարեն՝ օրվա իշխանություններն ավելացնում են մարդկանց կյանքի դժվարությունները և արտագաղթի հիմքերը համայնքի տասնյակ հազարավոր բնակիչների համար»,- այսմասին Աժ ամբիոնից ելույթ ունեցավ «Հայաստան» խմբակցության պատգամավոր Արման Ղազարյանը։

Մանրամասն՝ տեսանյութում