«Բարի օր 2». երբ ճշմարտությունը վերածվում է փորձության

Երեկ՝ փետրվարի 6-ին, «Կինոմոսկվա» կինոթատրոնում տեղի ունեցավ «Բարի օր 2» ֆիլմի պրեմիերան։ Հետաքրքիր սյուժե, հանրությանը հուզող թեմաներ և սիրելի դերասաններ. այս ամենն արդեն երկրորդ անգամ մեծ էկրան բերեցին ռեժիսորներ Արման Սարգսյանը և Գրիգոր Գասպարյանը։

Ֆիլմի գլխավոր հերոսը՝ տաքսիստ Հենդոն, այս անգամ բախվում է իր իսկ երազանքի հետևանքներին։ Եթե առաջին մասում նա մղձավանջային շրջապտույտի մեջ էր՝ ամեն օր արթնանալով նույն ամսաթվին, ապա նոր ֆիլմում ստիպված է ապրել ճշմարտության բեռի տակ։ Նրա երազանքը, որ բոլորն իրեն միայն ճշմարտությունն ասեն, վերածվում է փորձության՝ ստիպելով նրան առերեսվել անսպասելի և երբեմն ցավոտ իրողությունների։

Ֆիլմի ռեժիսոր Գրիգոր Գասպարյանի խոսքով՝ թիմը մտավախություն ուներ շարունակությունը նկարահանելու հարցում, քանի որ հաջողված առաջին մասից հետո երկրորդ ֆիլմի հանդեպ սպասելիքները մեծ էին։

«Առաջին ֆիլմը սիրվեց  երևանյան կինոթատրոններում. այն 160 հազարից ավելի մարդ դիտեց։ Շատ լավ արձագանքներ էինք ստանում թե՛ ֆիլմի էջերում, թե՛ Instagram-ում։ Մարդիկ ակնհայտորեն ցանկանում էին շարունակությունը տեսնել, և մենք, դեռ մեկ տարի չանցած, արդեն ներկայացրինք այն»,– նշեց նա։

Ֆիլմի ստեղծագործական թիմը հավատարիմ է մնացել սկզբունքին՝ ներկայացնել կյանքը հայելու պես, առանց խեղաթյուրելու իրականությունը։

«Ֆիլմը մեր հանրության հայելին է։ Միշտ չէ, որ հայելին գեղեցիկն է ցույց տալիս, բայց անկեղծ ու պարզ է արտացոլում մեր կյանքը»,– ասում են ռեժիսորները։

Սցենարի հեղինակները՝ Գառնիկ Մակվեցյանն ու Վան Գրիգորյանը, այս անգամ ոգեշնչված չեն եղել որևէ հայտնի արտասահմանյան ֆիլմից։ Եթե առաջին «Բարի օր»-ը համեմատվում էր «Արջամկան օրը» կինոժապավենի հետ, ապա երկրորդ ֆիլմի գաղափարը լիովին ինքնատիպ է։

Հենդոյի դերում կրկին հանդես է գալիս Մհեր Մխիթարյանը, ով խոստովանում է, որ իրական կյանքում չէր ցանկանա, որ բոլորը նրան ճշմարտությունն ասեին։

«Ճշմարտությունը երբեմն կարող է ցավոտ լինել։ Ես կընտրեի գեղեցիկ սուտը»,– կեսկատակ, կեսլուրջ ասաց դերասանը։

Հենդոյի տիկնոջ՝ Տաթևի կերպարը կերտած Ռոզի Ավետիսովան ընդգծում է, որ իր հերոսուհին երկրորդ ֆիլմում էական փոփոխությունների է ենթարկվել։

«Առաջին ֆիլմում Տաթևը դժբախտ կին է, ով անընդհատ լսում է ամուսնուն, իսկ երկրորդ ֆիլմում արդեն կայացած է, իր կարծիքն ունի ու արտահայտում է առանց կաշկանդվելու։ Բայց անկախ այդ փոփոխություններից՝ նա շարունակում է սիրել Հենդոյին»,– նշեց դերասանուհին։

Չնայած հումորային ժանրին, «Բարի օր 2»-ը շեշտադրում է ընտանեկան արժեքները։

«Մեր կյանքում ընտանիքն ամենակարևոր ինստիտուտն է, և այդ գաղափարը պետք է պահպանել։ Երկու ֆիլմում էլ այդ գիծը պահպանվել է, ինչը շատ ուրախալի է»,– հավելեց Ավետիսովան։

Ֆիլմը մեծ էկրան կբարձրանա առաջիկա օրերին՝ շարունակելով առաջին մասի հաջողությունը և հանդիսատեսին կրկին հրավիրելով ծիծաղելու, խորհելու ու գուցե մեկ վայրկյան կանգ առնելու՝ գնահատելու ճշմարտությունն ու այն գինը, որը պատրաստ ենք վճարել դրա համար։

Սյուզի Դավթյան