Սուխումի մուտքի բոլոր երեք կամուրջներն ապաշրջափակվել են

Աբխազական ընդդիմությունն ապաշրջափակել է Սուխումի մուտքի բոլոր կամուրջները, հայտնել Է ՌԻԱ Նովոստիի թղթակիցը:

Ակտիվիստները դադարել են խանգարել երթևեկությանը այն բանից հետո, երբ ուժայինները մեկուսարանից ազատ են արձակել 5 ընդդիմադիրների:

Նրանց ձերբակալել էին նախօրեին պատգամավորի հետ ծեծկռտուքի համար այն բանից հետո, երբ Աբխազիայի խորհրդարանն ընդունել է «Բազմաֆունկցիոնալ համալիրների իրավական կարգավիճակի կարգավորման մասին» օրենքը: Այս փաստաթուղթը կարգավորում է ներդրումների մասին Ռուսաստանի հետ միջկառավարական համաձայնագրի որոշ հասկացություններ։

Ընդդիմությունը պնդում է, որ խոսքը Աբխազիայում Ռուսաստանին բնակարաններ վաճառելու մասին է և դեմ է փաստաթղթի վավերացմանը:

Պետական անվտանգության ծառայության կողմից ակտիվիստների ձերբակալությունից հետո նրանց համախոհները փակել են Կոդորի կամուրջը, ինչպես նաև վերին և ստորին Գումիստինյան կամուրջները: Նրանք խոստացել են արգելափակած պահել անցումը, քանի դեռ ընդդիմադիրներին ազատ չեն արձակել։

Այսօր ձերբակալվածների գործերը հանձնվել են դատարան, որը որոշել է, որ հանցագործության դեպք չի եղել և փակել է վարույթը: