Մեդիագրագիտության հերթական դասը՝ Մուշեղ Իշխանի անվան N5 հիմնական դպրոցում

Մեդիագրագիտության շաբաթվա շրջանակում Մուշեղ Իշխանի անվան N5 հիմնական դպրոցի 8-րդ և 9-րդ դասարանների աշակերտների հետ այսօր հանդիպեց Yerkir.am-ի լրագրող Հերմինե Զեյնալյանը։ Բաց դասի ընթացքում կարևորվեց, թե ինչպես պետք է կողմնորոշվել  ժամանակակից տեղեկատվական խելահեղ հոսքերում՝ տարբերակելով սխալ և ճիշտ տեղեկատվությունն ու տեղեկատվական աղբյուրները։  Ընդգծվեց, որ  գրեթե ամեն օր թվային գործիքների հետ առնչվող և՛ աշակերները, և՛ ծնողները ապահովագրված չեն մանիպուլցվող ինֆորմացիայի ռիսկերից, ինչի հետևանքով մարդիկ շատ հաճախ մոլորվում և շփոթվում են՝ ակամա դառնալով տվյալ ապատեղեկատվության կրողն ու տարածողը։ Եվ քանի որ թվային մեդիա միջավայրը գնալով ավելի մեծ տեղ է զբաղեցնում մեր կյանքում, նաև օրինակներով ներկայացվեց, թե ինչպես տարբերակել կեղծ տեղեկատվական աղբյուրները՝ ապավինելով բացառապես ստուգված, հիմնավոր նյութեր հանրայնացնող սոցկայքերին և սոցիալական էջերին, այդ թվում՝ պաշտոնական աղբյուրներին։

Բաց դասն ընթացավ նաև հարցուպատասխանի ձևաչափով։

Նշենք, որ Մուշեղ Իշխանի անվան N5 հիմնական դպրոցն ակտիվ ներգրավվում է կրթական բոլոր ծրագրերում․ որակյալ կրթադաստիարակչության գործում արհեստավարժ մանկավարժների դերը բավական մեծ է։

Մուշեղ Իշխանի անվան N5 հիմնական դպրոցն այն բացառիկ կրթօջախներից է, որտեղ յուրաքանչյուր աշակերտին ցուցաբերվում է անհատական մոտեցում, հոգատարություն, ուշադրություն՝ իհարկե տնօրեն Էլլադա Հովհաննիսյանի՝ մանկավարժին հատուկ բարձր որակների ու մարդկային հատկանիշների շնորհիվ։  Դպրոցում սովորող մեծ թվով աշակերտներ հաղթանակներ են գրանցել և գրանցում  նաև՝ մարզական, երաժշտական, արվեստի բնագավառներում անցկացվող մրցույթներում, այդ թվում՝ միջազգային։ Ծնողների գնահատմամբ՝   դպրոցը ներքին արժեքներ կրող պիտանի քաղաքացի է ձևավորում։