Բայդենը մտադիր է դադարեցնել ԱՄՆ-ի երկարատև ռազմական գործողությունները

ԱՄՆ նոր նախագահ Ջո Բայդենը պարտավորվել է պատասխանատու կերպով ավարտել ԱՄՆ երկարաժամկետ արտերկրյա ռազմական գործողությունները՝ աջակցելով Աֆղանստանում խաղաղության հաստատման գործընթացին: Այս հայտարարությունը երեքշաբթի լրագրողների համար կայացած հերթական ճեպազրույցում ասել է ԱՄՆ պետդեպարտամենտի մամուլի ծառայության ղեկավար Նեդ Փրայսը. հաղորդում է ՏԱՍՍ-ը:

«Ավելի վաղ նշել էինք, որ նախագահ Բայդենը պարտավորվել է պատասխանատու կերպով դադարեցնել, այսպես կոչված, հավերժական պատերազմները: Մենք նաև նախատեսում ենք աջակցել Իսլամական Հանրապետության (Աֆղանստան) և «Թալիբան»-ի միջև ընթացող խաղաղ գործընթացին»,- ասել է դիվանագետը:

Այս կապակցությամբ նա պարզաբանել է, որ ԱՄՆ կառավարությունը դեռ ոչ մի հայտարարություն չի արել Աֆղանստանում ԱՄՆ ռազմական հետագա ներկայության մակարդակի վերաբերյալ: Այդուհանդերձ, Վաշինգտոնը սերտորեն խորհրդակցելու է այս գնահատականի շուրջ օտարերկրյա դաշնակիցների և գործընկերների հետ. հավաստիացրել է ԱՄՆ պետդեպի խոսնակը:

«Իհարկե, այս շաբաթ տեղի կունենա ՆԱՏՕ-ի պաշտպանության նախարարների հանդիպումը: Եվ մենք, ինչպես արդեն նշեցինք, ուշադիր ուսումնասիրում ենք ԱՄՆ–ի և «Թալիբան»-ի միջև համաձայնագրերի պարտավորությունները կատարելու կարողությունն ու պատրաստակամությունը» - շեշտել է Փրայսը և հավելել․ «Իհարկե, սերտ խորհրդակցությունները ՆԱՏՕ-ի գործընկերների և դաշնակիցների հետ այս հարցի վերաբերյալ ապագայում կլինեն այս գործընթացի առանցքային մասը։ Օսթինը (Պենտագոնի ղեկավարը) անհամբեր սպասում է դրան»։