Արցախի այս վիճակը, ես չգիտեմ, իշխանությունների սխալ, թե գիտակցված քաղաքականության հետևանք է․ պատգամավոր

Ադրբեջանցիները, եթե բացեն միակողմանի ճանապարհը եւ մեծացնեն ճնշումը ժողովրդի նկատմամբ, ապա շատ մեծ հավանականություն կա, որ Արցախից զգալի արտահոսք կլինի։ Այս մասին Yerkir.am-ի հետ զրույցում ասաց ՀՀ ԱԺ «Հայաստան» խմբակցության պատգամավոր Արթուր Խաչատրյանը։

Նրա խոսքով՝ Արցախցին որքան էլ ամուր է ու պինդ կառչած իր հողին, բայց փոքր երեխաներ ունեն եւ հասկանում են, որ երբ իրենց երեխան վիտամին չի ուտում, այլ միայն ածխաջրեր, դա վնաս է լինելու ամբողջ կյանքում։  

«Պետք է Հայաստանի քաղաքականությունը կառուցվի այն թեզի վրա, որ Արցախը չի կարող գոյատեվել Ադրբեջանի ենթակայության տակ։ Ամբողջ աշխարհը տեսնում է, որ այսօր Ադրբեջանը ցեղասպանություն է իրականացնում Արցախի ժողովրդի նկատմամբ, ինչպես են մտածում, որ արցախցին կարող է Ադրբեջանի կազմում ապահով ապրել»,- շեշտեց պատգամավորը։