կարևոր
2587 դիտում, 8 ամիս առաջ - 2023-06-13 14:15
Քաղաքական

Համահայկական զորաշարժի կոչ ենք անում, Արցախի ինքնորոշման իրավունքը սակարկման ենթակա չէ. Սաղաթելյան

ՀՅԴ Հայաստանի Գերագույն ժողովը հայտարարություն է ընդունել, համաձայն որի երկրի համար ճակատագրական այս պահին համահայկական զորաշարժի կոչ է հնչեցվում։ Այս մասին ՀՅԴ Հայաստանի նորընտիր գերագույն մարմնի ասուլիսի ժամանակ ասաց ՀՅԴ Հայաստանի ԳՄ ներկայացուցիչ, ՀՀ ԱԺ «Հայաստան» խմբակցության պատգամավոր Իշխան Սաղաթելյանը։

Ընդունված հայատարարությունում նշվում է, որ հայ ժողովուրդը և հայոց պետականությունը կանգնած ենգոյութենական ծանրագույն սպառնալիքի առջև։ Նշվում է նաև, որ Արցախի ժողովրդի ինքնորոշման, ՀՀ անկախության ուղղությամբ տարվող Հայաստանի իշխանությունների որդեգրած քաղաքականությունն ապազգային է և կործանարար։

«Ադրբեջանի շարունակվող ագրեսիան հանգեցնելու է նոր ցեղասպանության և Արցախի հայաթափման, հարցականի տակ է դնելու ՀՀ պետականության ապագան։ Հայ ժողովրդի թիկունքում հակասահմանադրական ընթացքով ձեռք բերված ցանկացած պայմանավորվածություն կամ փաստաթուղթ չունի իրավական, քաղաքական լեգիտիմություն։ Այն հղի է նոր պատերազմի սպառնալիքով և նոր ցնցումների է տանելու ողջ տարածաշրջանը։ Հակասահմանադրական և հակապետական այս ընթացքի անհապաղ կասեցումն օրախնդիր է և ազգային առաքելություն։ Սթափվելու, ընդվզելու, մեր պետությանն ու հայրենիքին համազգային միասնության ճակատով տեր կանգնելու վճառական պահն է»,– նշեց Սաղաթելյանը։

ՀՅԴ ԳՄ–ն համոզված է` իշխանությունների կողմից պարտադրված պարտվողականությանն ու անզորությանն այլընտրանք կա։

Հայտարարությամբ հաստատում են, որ համահայկական ներուժով հայ ազգը կարող է և պարտավոր է վերականգնել Հայաստան–Արցախ–սփյուռք եռամիասնությունը, երկրի անվտանգային համակարգը և ազգ–բանակ համազգային գիտակցումով բարձրացնել երկրի պաշտպանունակությունն ու հայոց բանակի մարտունակությունը։

Իշխան Սաղաթելյանն ընդգծեց` վերոնշյալ մարտահրավերներին դիմագրավելու նախապայմանն ազգային իշխանության ձևավորումն է և նոր որակի պետության կառուցումը։ ՀՅԴ Հայաստանի կազմակերպությունը և դաշնակցության աշխարհասփյուռ կառույցն իրենց ողջ ներուժով լծվելու են Հայաստանի և Արցախի պաշտպանությանն ու փրկությանն ուղղված համազգային ընդվզման, դիմադրության ճակատի ձևավորմանը։

Հիշեցնենք, որ ՀՅԴ Հայաստանի ԳՄ ժողովը տեղի է ունենում 2 տարին մեկ անգամ։ Վերջինը գումարվել է հունիսի 9-11-ը։ Դրան մասնակցել են Հայաստանի կազմակերպության Երևանի և ՀՀ բոլոր մարզերի ներկայացուցիչները։

Ժողովի ընթացքում քննարկվել են Հայաստանում և Արցախում ստեղծված իրավիճակը և մեր երկրի առջև ծառացած մարտահրավերները։

Ընտրվել է նաև 13 հոգուց բաղկացած նոր կազմ։