Ուկրաինան Համաշխարհային բանկից 132 մլն դոլարի վարկ է ստացել գյուղատնտեսության համար

Կիեւը Համաշխարհային բանկից 132 մլն դոլարի վարկ է ստացել գյուղատնտեսությանը աջակցելու համար, հայտնել է երկրի ֆինանսների նախարարության մամուլի ծառայությունը:

«2023 թվականի մայիսի 11-ին Ուկրաինան Համաշխարհային բանկից 132 մլն դոլարի չափով ֆինանսավորում է ստացել: Վարկային միջոցներն Ուկրաինայի պետական բյուջեի ընդհանուր ֆոնդ են մուտքագրվել  «Գյուղատնտեսության մեջ մասնավոր ներդրումների արագացում» ծրագրի նախագծի շրջանակներում նախատեսված միջոցառումների կատարման արդյունքներով»,-գերատեսչության ղեկավար Սերգեյ Մարչենկոյի խոսքը մեջբերել է մամուլի ծառայությունը: 

Նախարարի խոսքով՝ մասնավորապես, այդ գումարները կուղղվեն սննդի արդյունաբերության իրավիճակի բարելավմանը եւ Ուկրաինայի պարենային անվտանգության ապահովմանը:

Մայիսի առաջին կեսին Ուկրաինայի ֆինանսների նախարարության մամուլի ծառայությունը հաղորդել է Համաշխարհային բանկից գրեթե 190 միլիոն եվրո ստանալու մասին։

Այս շաբաթ Ուկրաինայի վարչապետ Դենիս Շմիգալը հայտարարել է, որ Կիեւը 2022 թվականի փետրվարից Եվրամիությունից ստացել է 20 միլիարդ դոլար՝ երկրի տնտեսական եւ ֆինանսական կայունությանն աջակցելու համար։