Երբ կավարտվի կորոնավիրուսի համավարակը. ԱՀԿ-ի կանխատեսումը

Կորոնավիրուսի համավարակը հաղթահարել կհաջողվի երկու տարուց էլ պակաս ժամանակում, կարծում է ԱՀԿ գլխավոր տնօրեն, դոկտոր Թեդրոս Գաբրեեսուսը: ԱՀԿ ղեկավարն այդ մասին հայտարարել է Ժնեւում կայացած ճեպազրույցի ժամանակ, հայտնում է RG-ն:

Նա SARS-CoV-2-ի ներկա համավարակը համեմատել է «իսպանկա»-ի համավարակի հետ, երբ 1918 թվականից մինչեւ 1920 թվականը, տարբեր գնահատականների համաձայն, գրիպի նոր տեսակից 50-100 միլիոն մարդ էր մահացել:

«Մենք ունենք խոցելիություններ, որոնք կապված են գլոբալիզացիայի, մարդկային կապերի ավելի մեծ ինտենսիվության հետ, բայց կան նաեւ առավելություններ՝ լավագույն տեխնոլոգիաները: Հետեւաբար, մենք հուսով ենք, որ այժմյան համավարակի վերջը կդրվի երկու տարուց էլ պակաս ժամանակահատվածում»,- կարծում է ԱՀԿ ղեկավարը:

ԱՀԿ-ում հույսեր են կապում պաշտպանության հասանելի միջոցների (սոցիալական հեռավորության, դիմակների) օգտագործման եւ նորի՝ պատվաստանյութերի առաջացման հետ: «Կարծում եմ՝ մենք կարող ենք տեղավորվել ավելի կարճ ժամանակահատվածում, քան 1918-ի գրիպի ժամանակ էր»,- եզրափակել է դոկտոր Գաբրեեսուսը: