Ազգային ուժերը՝ ՀՅԴ գլխավորությամբ, աշխարհի տարբեր անկյուններում պայքարում են Արցախի ապաշրջափակման համար. Գառնիկ Դանիելյան

Սիրելի հայրենակիցներ․

Արդեն 44 օր է` Արցախը շրջափակման մեջ է։

Մեր քույրերն ու եղբայրները հերոսաբար պայքարում են ոչ միայն Արցախի, այլ նաև Հայաստանի հանրապետության գոյության համար։

Այս օրերին մեր մտքերն ու աղոթքները ուղղված են Արցախ աշխարհին:

Մեկ անգամ ևս ուզում եմ հավաստել, որ ձեզ մենակ չենք թողնելու։

Ադրբեջանաթուրքական ցեղասպան քաղաքականությանը հանցավոր անտարբերությամբ հետևող ազգադավ իշխանություններից հույս չկա։

Ազգային ուժերը՝ ՀՅԴ գլխավորությամբ, աշխարհի տարբեր անկյուններում այս պահին բոլոր հնարավոր տարբերակներով պայքարում են Արցախի ապաշրջափակման համար։ Բազմաթիվ բողոքի ակցիաներից զատ, ՀՅԴ-ն սփյուռքում բանեցնում է նաև դիվանագիտական բոլոր լծակները։

• ՀՅԴ Հայ դատի Կանադայի հանձնախմբի աշխատանքների արդյունքում և խորհրդարանի ընդդիմադիր խմբակցությունների ջանքերով գումարվել է Կանադայի Խորհրդարանի արտաքին հարաբերությունների հատուկ նիստ՝ նվիրված Արցախի Հանրապետության շրջափակմանը։

Հունվարի 18-ին կայացած նիստի արդյունքում որոշվել է Արցախի շրջափակման հարցով ևս երեք նիստ գումարել, ինչպես նաև տեղում իրավիճակի շուրջ իրազեկվելու համար քննարկման հրավիրել ԱՄՆ-ում և Կանադայում Արցախի Հանրապետության ներկայացուցիչ Ռոբերտ Ավետիսյանին և Արցախի մարդու իրավունքների պաշտպան Գեղամ Ստեփանյանին։

Համապատասխան որոշման մեջ օգտագործված է Լեռնային Ղարաբաղի Հանրապետություն ձևակերպումը։

• Ֆրանսիայի նախագահ Էմանուել Մակրոնը հունվարի 23-ին Ելիսեյան պալատում ընդունել է Ֆրանսիայի հայկական կազմակերպությունները համակարգող խորհրդի համանախագահներ Արա Թորանյանին և Մուրադ Փափազյանին: Քննարկվել է 2022-ի դեկտեմբերի 12-ից Լաչինի միջանցքի փակման հետևանքով Արցախում ստեղծված իրավիճակը:

Գառնիկ Դանիելյան

 ԱԺ «Հայաստան» խմբակցության պատգամավոր, 

ՀՅԴ Տավուշի Մարզային կոմիտեի ներկայացուցիչ