Թրամփը հանդես կգա «հատուկ հայտարարությամբ»

ԱՄՆ նախկին նախագահ Դոնալդ Թրամփը նոյեմբերի 15-ին Ֆլորիդայի «Մար-ա-Լագո» կալվածքում հատուկ հայտարարություն կանի: Նա լրատվամիջոցներին հրավիրել է ներկա գտնվել միջոցառմանը: Այս մասին տեղեկացնում է New York Post պարբերականը՝ նշելով, որ Թրամփն, ամենայն հավանականությամբ, կհայտարարի 2024 թ.-ի նախագահական ընտրությունների իր քարոզարշավի մեկնարկի մասին:

Երկուշաբթի կայացած հանրահավաքի ընթացքում Դոնալդ Թրամփն ասել էր, որ պատրաստվում է «շատ մեծ հայտարարություն» անել:

Թրամփի նախկին խորհրդական Ջեյսոն Միլլերը Associated Press գործակալությանն ավելի վաղ հայտնել էր, որ կփորձի նախկին նախագահին համոզել հետաձգել հայտարարությունը մինչև դեկտեմբերի 6-ը. հենց այդ օրն է նախատեսված Ջեորջիա նահանգում սենատորի աթոռի համար պայքարող հանրապետական և դեմոկրատական թեկնածուների ընտրությունների երկրորդ փուլը:

Ըստ New York Post-ի՝ հանրապետական կուսակցության բազմաթիվ անդամներ նշում են, որ միջանկյալ ընտրություններում կուսակցության ցուցաբերած ոչ այնքան լավ արդյունքները և հատկապես Թրամփի աջակցությունը վայելող թեկնածուների ձախողումը ցույց են տալիս, որ 2024 թ.-ին կուսակցությանը նոր «դրոշակակիր» է հարկավոր: Թրամփի կուսակիցներից շատերը նշում են, որ ընտրողներն այլ առաջնորդ կցանկանային տեսնել: