Այս ռեժիմը միտումնավոր հարձակվեց եկեղեցու, կրթության և Սփյուռքի նախարարության վրա

«Արեւելք» էլեկտրոնային լրատվամիջոցի խմբագիր Սաքո Արյանը «Քաղբանտարկությունը ժողովրդավարական բաստիոնում. օրենք եւ ամենաթողություն» խորագրով Ֆրանսիայի հրապարակում տեղի ունեցած քննարկման ընթացքում կտրուկ քննադատության է ենթարկել ներկայիս իշխանությունների դիրքորոշումը սփյուռքի հարցում:

Նրա խոսքով՝ Հայաստանի իշխանությունները հարձակում են նախաձեռնել երեք ուղղությամբ՝ Հայ Առաքելական եկեղեցու, հայկական ազգային կրթության եւ Սփյուռքի նախարարության նկատմամբ:

«Անկասկած, կհիշեք, որ, այո, Սփյուռքի նախարարությունը քննադատներ ուներ, սակայն հանուն արդարության պետք է նշել, որ այն դարձել էր մի կառույց, որն ամեն կերպ աջակցություն էր տրամադրում մեր հայրենակիցներին, որոնք փրկվել են Սիրիայում պատերազմի դաժան ժամանակ: Եվ մասնագիտական առումով, որպես լրագրող, ես այդ ամենը վերապրել, վավերագրել եմ»,- ընդգծել է Սաքո Արյանը:

Լրագրողն ընդգծել է, որ Սփյուռքի նախարարության դերակատարության նմանօրինակ նվազեցմամբ, նախարարի պաշտոնը լիազոր ներկայացուցչի պաշտոնի հասցնելով՝ փորձ է արվել խզելու կապը Հայրենիքի եւ Սփյուռքի միջեւ:

Սակայն Սաքո Արյանը նշել է, որ դա իրականություն չի դառնա, քանի որ Սփյուռքը այնպիսի կառույց է, որը գոյություն ունի ոչ մեկ տարի, այն ամուր արմատներ եւ գաղափարախոսություն ունի:

Նա հավելել է, որ այսօր Հայաստանում կան քաղբանտարկյալներ, որոնք հարգանքի են արժանի: