Օտարահպատակների նպատակն էր ամբողջապես խեղաթյուրել Հայ դատի Ամերիկայի հանձնախմբի հայտարարության էությունը և լծվել դեսպանի անձնական պաշտպանությանը. արձագանք

Օտարահպատակ այդ երևույթներին պատասխանելու ցանկություն առանձնապես չունեմ, մանավանդ, որ դրանց նպատակն էր ամբողջապես խեղաթյուրել Հայ դատի Ամերիկայի հանձնախմբի հայտարարության էությունը և լծվել դեսպանի անձնական պաշտպանությանը։ Այդ մարդկանց հետաքրքրում է ոչ թե հայ-ամերիկյան հարաբերությունների որակը, այլ ուղղակի դեսպանի անձը, ինչը այլևայլ եզրակացությունների տեղիք կարող է տալ։

 

Հայ-ամերիկյան հարաբերությունների զարգացումը Հայ դատի Ամերիկայի հանձնախմբի քաղաքական առաջնահերթություններից մեկն է․ Միացյալ նահանգները Հայաստանում պետք է ներկայացված լինի այնպիսի դիվանագետի կողմից, որը նախ և առաջ ամերիկյան արժեքների գործնական կրող է և հանձնառու դիվանագետ, ով ի թիվս ալյնի չի տապալի Արցախում ամերիկյան հումանիտար ներգրավվածությունը։

 

Գրառումս եզրափակեմ Հայ դատի Ամերիկայի հանձնախմբի նախագահ Րաֆֆի Համբարյանի նկատառմամբ․ «Ինչպես նախկինում ասել եմ՝ Հայ դատի հանձնախումբը ցանկանում է, որ Հայաստանում ԱՄՆ-ի յուրաքանչյուր դեսպան լինի հաջողակ: Ցավոք, դեսպան Թրեյսին իր լռությանն ավելացրել է 44-օրյա պատերազմի ընթացքում ավելի քան 90,000 տեղահանված արցախահայերի և Հայաստանի ինքնիշխան տարածքում ադրբեջանական շարունակական ոտնձգությունների նկատմամբ անխոհեմ արհամարհանքը։ Հայաստանում դեսպանի պաշտոնում իր պաշտոնավարման երեք տարին լրանալուց հետո դեսպան Թրեյսին շարունակում է ձախողել հարց առ հարց՝ շատ հեռու լինելով Հայաստանում ամերիկյան հանձնառու դեսպանից հիմնական մասնագիտական որակներից»։